La cuppa grischuna ha cumenzà cun in emprim gol per l'USSI tras Lars Zala gia en la terza minuta. Ad Andriu Alig èsi dentant gartegià d'egualisar per il CB Lumnezia en la 26avla minuta. In penalti dispitaivel en la 34avla minuta, realisà da Matthias Alig, ha manà ils Lumnezians en avantatg cun 2:1.
En la segunda mesadad ha Schluein Glion mussà ina ferma reacziun. Zala ha pudì egualisar en la 52avla minuta al 2:2. Il temp regular è ì a fin cun in pari – tge ch'ha muntà prolungaziun.
En 93avla minuta ha Yanick Demont dal CB Lumnezia tutgà al 3:2. Curt suenter suonda la cunterattatga al 3:3, tras Luca Coray en 99avla minuta. In ulteriur gol da Serafin Bundi en la 110avla ha manà l'USSI al 4:3. Gian Sgier ha en l'ultima minuta cun in culp liber fatg il punct final al 5:3.
Ils puncts decisivs dal final US Schluein Glion vs. CB Lumnezia
Themen in diesem Liveticker
- La Cuppa grischuna 2025 va a la US Schluein Glion — 5:3
- Il culp liber suenter foul va en la rait – 5:3 per USSI
- 110avla minuta – Serafin Bundi metta sin 4:3 per USSI
- USSI egualisescha cun Gian-Luca Coray sin 3:3
- CBL va en avantatg 3:2 en la 93avla minuta cun Yanick Demont
- Prolungaziun – CBL po defender il pari cunter l'USSI
- 85avla minuta – Fabio Casanova spendra
- Paucas minutas avant la fin dal temp regular – 2:2
- USSI fa puspè dapli squitsch
- Lars Zala egualisescha per USSI sin 2:2
La situaziun da partenza da las equipas
In duel stget sursilvan per la curuna dal ballape grischun. Quai n'hai anc mai dà. Ed era n'hai anc mai dà ch'il CB Lumnezia cuntanscha il final. Ils Lumnezians pudessan pia scriver istorgia. Vitiers ir per il «double». Dapi sonda saira èn els ils victurs da la 4. liga e giogan la stagiun che vegn en la 3. liga – nua ch'i vegn lura a dar regularmain il derbi che spetga uss gia ina giada en il final da la Cuppa grischuna. Ils Lumnezians n'han nagut da perder.
Ils favurits èn stads ils da Schluein Glion che giogan davanttiers en la 3. liga. Il club da la Foppa è ils ultims 15 onns stà pliras giadas en il final da la Cuppa grischuna, e trais giadas gudagnà titel e pocal. L'ultima giada avant dus onns.
Turniers da cuppas da ballape han lur atgnas reglas. Quai mussa l'istorgia adina puspè. Cura che clubs da ligas pli bassas battan ils gronds e procuran per sensaziuns sin ils pastgets da ballape. Ed uschia era avant quest final be ina chaussa segira, ch'il pocal da la cuppa 2025 arriva en Surselva.
Co vai...?
Mezfinal: CB Lumnezia scriva istorgia
Ils Lumnezians cuntanschan per l‘emprima giada il final da la Cuppa grischuna da ballape. Il CB Lumnezia che dat a la testa da la 4. liga ha gudagnà ordaifer il mezfinal cunter il CB Trun/Rabius cun 3:1. Igl è ina victoria meritada.
L‘equipa da la Cadi n‘ha mai propi chattà en il gieu ed ha strusch creà schanzas da gol. En la 25avla minuta ha Mauro Demont sajettà il 1:0 per Lumnezia tras in culp liber ord ina distanza da bun 17 meters. Suenter pausa, en la 54avla minuta, ha l‘emprim Mathias Alig tutgà al 2:0 tras in penalti ed Andriu Alig ha lura fatg tut cler cun ses 3:0 bun 10 minutas avant la fin dal gieu.
En il temp supplementar e cun la davosa acziun dal gieu è il sulet gol per Trun/Rabius crudà, igl è stà in autogol ch'ha sulettamain midà in zic cosmetica vid il resultat.
Per Trun/Rabius, che manchenta uschia da vegnir per la segunda giada en roda en il final da la Cuppa grischuna, èsi in‘ulteriura dira frida. Gia en il campiunadi ha l‘equipa da Claudio Bundi pers ils emprims trais gieus da la runda da primavaira ed è uschia ruschnada sut il stritg.
Tut auter la situaziun dals Lumnezians ch‘èn sin ina vaira unda da success. Els han bunas schanzas da dumagnar la promoziun en 3. liga e plinavant da cumbatter senza squitsch per il buccal da la Cuppa grischuna. Er cunter l‘US Schluein Glion n‘èn ils Lumnezians numnadamain betg ils favurits.
Mezfinal: Victoria meritada per Schluein Glion
Persvas dal tuttafatg n'ha l'US Schluein Glion betg en il mezfinal cunter il FC Landquart. Tuttina ha l'equipa dal trenader Mirco Zala battì Landquart a chasa cun 2:1 e quai meritadamain. Spezialmain avant pausa ha l'equipa da la Foppa gì dapli dal gieu ed ha gì pliras chaschuns da manar pli aut. Oravant tut cun ballas autas sin ils sperts attatgaders è l'USSI vegnida malsegira.
Il topscorer Lars Caduff è dentant il sulet giugader ch'ha tutgà la noda avant pausa cun in ferm sajet ad aut ord curta distanza en la 27avla minuta. Curt avant pausa ha Landquart gì ina gronda schanza d'egualisar, els han dentant mo tutgà la petga ord curta distanza.
La segunda mesadad ha cumenzà optimal per l'equipa da Schluein Glion. Remy Manetsch ha sajettà en la 57avla minuta il 2:0 suenter ina bella staffetta da pass. La reacziun da Landquart è dentant vegnida immediatamain. Cun in corner direct han els scursanì en la 61avla minuta. Durant las ultimas 30 minutas ha Landquart bain empruvà anc ina giada tut, malsegir avant gol èsi però mo stà darar, uschia che Schluein è vegnì da tegnair il 2:1 senza pli gronds problems.