Nino Schurter, ch’ha triumfà per la 5avla giada en seria a Soloturn, è stà bun 20 secundas pli spert che Julien Absalon, il dubel campiun olimpic. Sin il terz plaz è vegnì Lukas Flückiger, in ulteriur Svizzer.
Andrin Beeli sin ils fastizs da Schurter
Ina buna prestaziun ha er Andrin Beeli da Sagogn mussà. Il giuven da 20 onns è vegnì 24avel da passa 50 mountainbikers ch’èn partids cun l’elita. Andrin Beeli è anc vegnì classa en la categoria dals U23. Là ha el cuntanschì il 6avel plaz.
Jolanda Neff ina classa per sasezza
Tar las dunnas ha Jolanda Neff triumfà. La victura da la cuppa mundiala generala da l’onn passà ha gudagnà cun in avantatg da bunamain ina minuta avant Esther Süss, la victura dals davos 5 onns a Soloturn a questa cursa a l’ur dals Bike Days. Davos las duas Svizras è la Svedaisa Jenny Rissveld classada sco terza.
Vital Albin triumfescha tar ils juniors
Ina victoria grischuna hai er dà en la cursa dals juniors. Vital Albin da Tersnaus ha gudagnà il sprint final ed uschia festivà in ulteriur grond success. Cun Ursin Spescha da Sevgein sco 9avel ha anc in ulteriur mountainbiker dal Club da velo Surselva fatg ina buna figura.
Vital Albin, ch’è dal medem lieu sco Nino Schurter, aveva gia mussà avant dus onns ses potenzial. Il 2013 era Vital Albin vegnì a Lai campiun svizzer dals U17.
RR sportissimo 12:00