Pervia da la crisa da Corona han ils organisaturs cun Simona Barmettler a la testa sco scheffa dal comité d’organisaziun ditg stuì tremblar per la premiera da questa cursa extrema. Ina gia ch’il Cussegl Federal ha dà glisch verda ad occurrenzas da sport fin a 300 persunas n’è dentant nagut pli stà en via als organisaturs. La cursa ch’è pia limitada sin 300 participants saja dentant quasi vendida ora di Stefan Schwenke, il manader da project e schef da medias.
Rheinquelle Trail 2020
Il mument vegn lavurà intensiv vid il concept da segirtad. Pussibel èsi era ch’i dettia ina partenza d’interval per uschia tegnair en anc meglier da distanza di Stefan Schwenke.
La cursa a la tgina dal Rain
I dat duas cursas, la cursa roiala sur bun 38 kilometers cun bunamain 3’000 meters differenza d’autezza e la cursa curta sur circa 16 kilometers e 1’200 meters differenza d’autezza. La partenza è tar omadus cursas a Sedrun. Durant che la cursa curta maina da Sedrun sin il Tgom puspè enavos a Sedrun maina la cursa roiala dal Tgom vinavant via Selva e Tschamut sin il Piz Cavradi, lura sper il Lai da Toma ora sin il Piz Pazzola, il pli aut punct da la cursa. Via il Pass Alpsu vai per ils curriders puspè enavos fin a Sedrun.
