Selina Gasparin banduna l'Engiadina

Loipas gia davent da l'entschatta da november, quai garantescha la nova Arena da biatlon da Lai agl ur dal vitg da Lantsch. L’infrastructura a Lantsch è uschè buna che las trais soras Selina, Elisa ed Aita Gasparin han bandunà lur stretga patria, l’Engiadina, ed èn sa chasadas a Lantsch ed a Lai.

L'equipa naziunala svizra da biatlon nizzegia l'infrastructura perfetga e trenescha actualmain a Lantsch - enstagl da far viadi si en il nord da la Scandinavia nua ch'igl è da quest temps quasi igl entir di stgir.

Co atletAs profiteschan da l'arena da biatlon a Lantsch

3:26 min, Telesguard dals 1.11.2016

Infrastructura perfetga a Lantsch

L’infrastructura en l’Arena da biatlon da Lai è optimala per sportistas da professiun sco las trais soras Gasparin. Il stan da sajettar cun 30 schibas correspunda al standard da la cuppa mundiala. Ina pista asfaltada che vegn anc engrondida lubescha da trenar la stad cun skis da rodas.Cun il nov cundriz da far naiv da la Snowfactory datti naiv cun temperaturas sur null grads. Uschia èn las loipas prontas ditg avant che sontg Pieder regala naiv natirala.

Il Nordic House è prest pront

En in mais è lura era l’infrastructura sper la loipa pronta. Pir lura è l’Arena da biatlon a Lai ina vaira arena. Ils 3 da december è l’avertura dal Nordic House, il nov stabiliment multifuncziunal cun ustaria, gardarobas, stizun da sport, stanzas da material e da tecnica e 60 letgs per camps da trenament.

RR actualitad saira 17:00