Sgular sco in'evla sur pizza e vals. Quai è il siemi dad Orlando Molinari. Il manader da construcziun da Zernez passenta ses temp liber il pli gugent en l’aria. Sche pussaivel pachetescha el ses parasgol e va en in lieu nua ch'el po ir a sgular. Sin ses viadis en l’aria contempla el la natira ed ils animals or dad in'autra perspectiva – la perspectiva dals utschels.
Nus pilots schain che la taila da plastic dal parasgol è la taila da noss siemis
Dapi passa diesch onns pilot
L’onn 2009 ha Orlando Molinari cumenzà cun il sport da parasgular. Dus onns pli tard ha el fatg la patenta sco pilot da parasgol. Fin al di dad oz ha Orlando Molinari fatg numerus sgols. Il pli gugent sgola el distanzas lungas, ensemen cun ses amis.
Jau hai pudì sgular in pèr giadas cun l’evla u cun il girun. Quai è ina sensaziun.
Empruvar da far quai ch'ils utschels fan
Per savair sgular cun il parasgol ston ins savair leger l’aura. Las nivlas pon magari dar infurmaziuns co che la situaziun è en l’aria. Infurmaziuns pon ins dentant er leger da las randulinas u dad auters utschels. Las randulinas sgolan per exempel magari aut per tschappar insects. Dentant er l’evla u il girun. Sch'ins ha ina giada la schanza u la fortuna da sgular cun quests animals è quai ina sensaziun.
