Alex Fiva u Talina Gantenbein – franc ils pli enconuschents skicrossists grischuns, ma betg ils sulets. Dapi passa in onn va regularmain a la partenza da la cuppa mundiala era Sandro Lohner da Panaduz. El ha 28 onns, ha terminà la stad a Bienna ses studi d’inschigner da construcziun en lain ed aveva atgnamain cumenzà cun il ski alpin. Cun 16 onns ha el però midà tar il skicross.
Malgrà che Sandro Lohner è ina persuna ruassaivla e modesta dovra el action ed adrenalin. Ch’el è però pir uss sin via da fitgar pe en la cuppa mundiala ha era dar far cun ses problems da sanadad ch’han franà el plirs onns. Tranter auter ha el gì la malsogna da Pfeiffer, e lura patescha Lohner era da long-covid. Ord quests motivs avess el prest dà si ses sport avant bun trais onns, lura dentant tuttina anc dumagnà il pass en in cader da Swiss-Ski.
Pir dapi trais onns sun jau en il cader da skicross ed hai bainprest 30 onns – dentant da chalar n'è anc nagin tema.
Ils gieus olimpics a Livigno en mira
Ses potenzial ha Sandro Lohner mussà in’emprima giada la fin schaner dal 2024 cun daventar 6avel en la cursa da la cuppa mundiala a San Murezzan. Fin oz ses meglier resultat da la carriera. Quest onn è il sportist da Panaduz er daventà campiun svizzer da skicross. Plazs sut ils top 10 en la cuppa mundiala, quai è ina da sias finamiras en questa stagiun. Plinavant siemia Sandro Lohner d'ir als gieus olimpics il favrer a Livigno. La concurrenza è gronda, Lohner è dentant franc in dals candidats per in dals quatter plazs che la Svizra ha da bun a questa occurrenza che segir in dals puncts culminants d'ina carriera sportiva.