Siglir tar il cuntegn

Header

cuntegn

Skis da turas Arina Riatsch chala, Flurin Wehrli cumenza

Suenter trais onns sorta Arina Riatsch da l’equipa naziunala da skis da turas. Perquai è Flurin Wehrli vegnì nominà en il cader regiunal.

Il sport da skis da turas n'è anc betg uschè grond en Svizra ch'ins pudess viver dad el. Auter ch'en noss pajais vischins sco l’Italia u la Frantscha. Suenter ch'Arina Riatsch da Sent ha fatg part trais onns da l’equipa naziunala da skis da turas, ha la sportista da 23 onns uss decis da dir adia a l’equipa. La giuvna sportista marida questa stad. L’atun terminescha ella lura la scolaziun sco tgirunza da malsauns. Uschia n'è ella betg pli pronta da suttametter tut al sport da prestaziun. Ella vul passentar dapli temp cun ses um futur. Per surviver sto ella lavurar, magari er irregular, uschia n'èsi betg pli pussaivel da far era anc sport sin quest livel.

Titel da vicecampiunessa mundiala

La carriera dad Arina Riatsch è ida fitg sperta. Durant ils trais onns ch'ella è stada part da l’equipa naziunala ha ella gudagnà la stagiun 2019 il titel da vicecampiunessa mundiala en la categoria U23 a Villars. Il medem onn ha ella era gudagnà per l’emprima giada en la cuppa mundiala da skis da turas. Segiramain avess ella gì las premissas per cuntinuar sin quest livel. Pervia da motivs persunals ha ella uss dentant decis da sortir dal cader naziunal.

Nominaziun per il cader regiunal

In auter atlet da skis da turas engiadinais stat percunter anc a l'entschatta da sia carriera en il cader dal Club alpin svizzer. Flurin Wehrli da Puntraschigna è vegni nominà dal CAS en il cader regiunal. Il sportist da Puntraschigna ha 19 onns. El ha cumenzà cun passlung e fa uss dapi in tschert temp mo pli sport da skis da turas. Quest sport fascinescha il giuven bostger anc pli fitg ch'il passlung. Surtut da far in sport en las muntognas plascha fitg bain a Flurin Wehrli.

Suenter giarsunadi midada en il Partenz

Questa stat terminescha Flurin Wehrli ses emprendissadi da bostger. Suenter fa el midada en il Partenz e surpiglia là ina plazza da stagiun. En il Partenz sa il giuven sportist profitar anc pli ferm da l’infrastructura da trenament. Magari datti lura er la pussaivladad da trenar cun il campiun mundial Arno Lietha da Fideris.

RTR Sportissimo 17:00

Artitgels legids il pli savens

Scrollar a sanestra Scrollar a dretga