Siglir tar il cuntegn

Header

audio
Sandro Simonet en vista al slalom da chasa
Or da Actualitad dals 07.01.2023. Maletg: Keystone
laschar ir. Durada: 7 minutas 15 Secundas.
cuntegn

Slalom ad Adelboden Sandro Simonet: «Jau ma legrel fitg»

Emprim il slalom dad Adelboden ed in’emna pli tard il slalom da Wengen. Quellas duas cursas tutgan onn per onn tar in dals puncts culminants da la stagiun da Sandro Simonet, il spezialist surmiran da slalom.

Las cursas en la Part Sura Bernaisa tutgan tar ils gronds classichers en la cuppa mundiala. Ed igl è er gist dus dals pli pretensius slaloms da l’onn. Sbagls na lubeschan quellas duas plauncas da Wengen e dal Chuenisbärgli quasi nagins.

Datti ils emprims puncts ad Adelboden?

Avant dus onns era Sandro Simonet vegnì 25avel ad il slalom da Wengen. Fin oz è quai il sulet resultat a quels classichers en sia disciplina da parada. Ad Adelboden, nua ch’i ha anc mai propi funcziunà sco giavischà, vul il skiunz da 27 onns midar quai e finalmain gudagnà ses emprims puncts. Il sustegn dals fans ha el en mintga cas. La culissa en l’arrivada dal Chuenisbärgli è adina spectaculara. Plinavant vegn Simonet er sustegnì da ses club da fans che fa la dumengia il viadi dal Grischun ad Adelboden.

Mintga medaglia ha duas varts

Avant bun dus onns era Sandro Simonet vegnì terz en il slalom da la cuppa mundiala da Chamonix. Fin oz è quai il pli grond success en sia carriera. Mo dapi lura èsi be pli ì a val. Simonet ha strusch pli ina giada cuntanschì l’arrivada, la fin da la stagiun passada ha el anc stgarpà il liom cruschà tar il slalom da notg a Flachau, lura vegnì tramess enavos en il cader C da Swiss Ski ed il davos anc pers in da ses principals sponsurs. Sandro Simonet n’ha dentant betg dà si ed è restà positiv. Motivaziun ed energia dettian ad el principalmain ils buns e bels muments, ma er las bunas prestaziuns da ses frar pli giuven, Livio Simonet, ch’è en il mument pli fitg en il focus ch’il frar grond.

Actualitad 17:00

Artitgels legids il pli savens

Scrollar a sanestra Scrollar a dretga