Felicia è sa participada a questa cursa dapi l’entschatta, ils davos onns adina cun la sora giuvna Justina. Quest onn partan ellas a la cursa Gendusas sur bun 11 kilometers cun radund 1’000 meters differenza d’autezza. Avant 10 onns era la trofea fitg speziala, ina cursa cun skis da turas, insatge che paucs enconuschevan da lezzas uras, di Justina. Per ellas saja quai stà a l’entschatta er in experiment. Er cunquai che la cursa saja quasi avant l’isch-chasa, sajan ellas adina stadas motivadas da sa participar.
Era sch’i saja oz ina cursa che giaja sin temp, prendian ellas tut in zic pli luc. Ellas hajan schizunt magari peda da far ina fotografia u l’autra, di Felicia. Ins possia giudair quasi dapli dad ir ensi, engiu saja savens in pulit sa mudregim cun quests skis da turas che sajan oz levs ed uschia plitost fatgs per ir ensi. Cun adina esser a la partenza han las soras Deflorin oz dentant era blera rutina e san sin tge mirar e nua ch’igl è da sa gidar ina cun l’autra. Il principal saja oravant tut er da giudair e far tut senza hectica, uschia las soras Deflorin da Mustér, duas da paucas indigenas che van onn per onn a la partenza da la Trofea Péz Ault.
RR Sportissimo 17:00