Avant dus onns ha il Minisguard visità Gianna Cavegn durant in trenament. Gia là era il sport da nudar sia gronda passiun.
Oz dominescha quest sport anc pli fitg ses mintgadi. La giuvna da Cuira trenescha il mument sis giadas per emna. Cun l'entschatta da la nova stagiun, e l'entrada en la classa da talents a Cuira mez d'avust, vegnan anc dapli trenaments latiers. Il focus sin il sport da nudar vegn uschia anc pli concentrà.
Nudar è dapli ch'in hobi
Gia sco pitschna era l'aua ses lieu preferì. Cun ils onns è la passiun creschida. Ella ha cumenzà a participar a cursas e fa dapi dus onns il sport «a moda pli seriusa». Gianna Cavegn fa era part al cader regiunal da la Svizra orientala. Ils resultats èn arrivads spert sco giuvna: medaglias a concurrenzas naziunalas e success als campiunadis svizzers.
Fin oz ha ella gia gudagnà 10 medaglias a campiunadis svizzers. Il 2025 perfin 3 dad aur ed 1 da bronz. Als campiunadis svizzers da quest onn hai dà ina medaglia da mintga colur.
Emprender d'acceptar sconfittas
Fin questa stagiun pareva tut dad ir mo ensi. Ma ils ultims mais han purtà novas sfidas. Blessuras e muments da dubi han fatg part al mintgadi da la giuvna da 13 onns.
Questas fasas han regurdà mai che jau dovrel quest sport.
Plinavant ha ses trenader dals ultims onns, cun il qual ella aveva ina stretga colliaziun, bandunà il club da nudar da Cuira. Betg simpel per la giuvna ambiziusa. Quellas experientschas han dentant era mussà, quant impurtant che quest sport è per ella.
Impressiuns da cursas
-
Bild 1 von 6. Avant ina cursa è era tadlar musica adina ina part da la preparaziun – sper il sa stgaudar ed exercizis da flad. Bildquelle: Norbert Cavegn.
-
Bild 2 von 6. Focus total: La part mentala è ina part impurtanta tenor la giuvna da 13 onns. Bildquelle: Norbert Cavegn.
-
Bild 3 von 6. Ils ultims onns ha Gianna Cavegn gudagnà numerusas medaglias a campiunadis svizzers. Bildquelle: Norbert Cavegn.
-
Bild 4 von 6. Nudar en dies è la disciplina preferida da Gianna Cavegn. Bildquelle: Norbert Cavegn.
-
Bild 5 von 6. Fin uss è Gianna Cavegn sa participada a concurrenzas svizras. Davent da proxima stagiun è la finamira era dad ir a cursas internaziunalas. Bildquelle: Norbert Cavegn.
-
Bild 6 von 6. L'aua è il lieu, nua ch'ella è il pli gugent. Bildquelle: Norbert Cavegn.
La meglra Svizra en sia disciplina
En il nudar en dies è Gianna Cavegn actualmain la meglra nudadra svizra da sia annada. Da quai è ella era loscha, perquai ch'igl è per regla la disciplina, nua che fitg blers han fadia. Precis questa disciplina è dentant sia preferida.
Jau sai simplamain quai. E lura han ins era automaticamain plaschair.
Ed er en las ulteriuras disciplinas sco «crawl» e «delfin» tutga la nudadra cun geniturs sursilvans tar las meglras da sia annada. Sulettamain nudar a rauna na tutga betg tar sias fermezzas.
Pass per pass – cun pazienza, lavur e plaschair
Ils success han avert novas portas. A partir da mez d'avust visita Gianna Cavegn la classa da talents a Cuira. Quai pussibilitescha ad ella da trenar anc pli professiunal e probabel er da sa participar a concurrenzas internaziunalas.
Malgrà quai resta ella prudenta. Ella vul observar, co ch'ella sa sviluppa, avant da fixar finamiras memia grondas per il futur. La giuvna sa era ch'esser tranter las meglras da sia annada na munta anc betg automaticamain ina gronda carriera en il sport da prestaziun.
Mo era sch'ella ha pir 13 onns, datti gia cursas che restan en memoria. Ina da quellas è la cursa sur 100 meters crawl als campiunadis svizzers avant dus onns. Lezza giada è ella nudada cun la tecnica dal gallop freestyle. «Quai è stà in sentiment sco sgular». Precis quests muments vul Gianna Cavegn puspè viver en l'avegnir. Dentant senza precipitar ses svilup. Ella vul ir pass per pass – cun pazienza, lavur e plaschair vid il sport da nudar.