Siglir tar il cuntegn

Header

video
L'Engiadina en la fevra da karate
Or da RTR Social dals 29.06.2022.
laschar ir. Durada: 1 minuta 19 Secundas.
cuntegn

Sport regiunal Sports da cumbat tiran ils uffants

Circa 50 uffants treneschan ed emprendan karate en la scola «Kyokushinkai Karate Engiadina». Ils uffants han la pussaivladad da trenar ina giada l’emna a Zuoz, a S-chanf ed ad Ardez. Quai che ha cumenzà fitg pitschen è creschì durant ils ultims onns ad in bel moviment.

Cumenzà ha tut cun in bab che vuleva trenar karate en l'Engiadina. Suenter in pèr trenaments ha il bab ina giada era prendì ses figl cun el – e schont era sveglià l’interess per quest sport er tar l’uffant. Suenter l’emprim è vegnì latiers in segund, ed adina uschia vinavant. En la scola da karate «Kyokushinkai Karate Engiadina» treneschan circa tschuncanta uffants l’art da cumbat giapunaisa.

audio
Rosina Pinchera davart karate en l'Engiadina
ord Actualitad dals 28.06.2022.
laschar ir. Durada: 3 minutas 23 Secundas.
Blera glieud pensa: Karate, là pitg’ins in l’auter. En emprima lingia va quai però per respectar in'autra persuna.
Autur: Rosina Pinchera scolara da karate «Kyokushinkai Karate Engiadina»

Mintga segund lavurdi trenament

Il trenament cumenza mintga giada tuttina. Il scolast u alura il «Sempai» Fernando Marques dumbra sin quatter – e tar mintga cifra respundan ils uffants cun il num da la posiziun e mussan quella er gist. Ils exercizis cumenzan adina cun las posiziuns da la tschinta cotschna. La gronda part dals uffants mussa uschia ina posiziun suenter l’autra. Ils pli pitschens emprovan da far suenter las posiziuns u alura ch'els observan.

audio
Natalia Trombetta va al trenament cun ils uffants Lara e Nico
ord Actualitad dals 28.06.2022.
laschar ir. Durada: 3 minutas 22 Secundas.
Sch'ils uffants pon far ils moviments, dat quai ina enorma satisfacziun ad els. E sco genitur fa quai bain da vesair ch'ils uffants fan quai cun plaschair.
Autur: Natalia Trombetta mamma

A la fin dal trenament dat quai in pitschen cumbat

Suenter il trenament ch'è per gronda part l’exercitar las differentas posiziuns dat quai per ils uffants anc in cumbat. Il scolast emprova da metter ensemen ils uffants ch'èn quasi tuttina vegls e gronds. U alura er uffants ch'han il medem nivel da qualitad. Mintgatant datti dentant era in cumbat tranter dus adversaris, nua ch'in è gia pli avanzà. Quai per promover las abilitads da quella u da quel ch'è anc in zichel pli flaivel. Tut resta dentant sin basa faira e da respect. Perquai va quai en emprima lingia tar il karate. Er sche il sport è in sport da contact. Insatge dal pli impurtant è da respectar l'autra persuna.

Or da l'archiv:

Judo a Mustér era in grond boom

Il club da Budo Mustér era ils onns 80 in dals ferms clubs da judo en il Grischun. Alura eran plirs activs en las concurrenzas chantunalas e naziunalas tranter ils megliers. Ma quai haja midà, ed ils ultims onns n’hajan ins betg pli ils ferms lutgaders sco lura, di Rino Deflorin, cunfundatur dal club.

audio
Judo e ses svilup en la Surselva
ord Actualitad dals 29.06.2022.
laschar ir. Durada: 3 minutas 47 Secundas.

Naschì era tut il 1969, cura che Reto Lutz era vegnì a star a Mustér ed ha purtà il sport giapunais a Mustér. Alura han plirs giuvens vulì emprender quai ed han laschà fascinar dal sport che promova tant il corp sco era il spiert.

Ils ultims onns surtut uffants che fan judo

Ils uffants sajan adina stà fidaivels al club, di Rino Deflorin. Ma cura che quels vegnian ord scola ed hajan da far in emprendissadi u ina scolaziun, alura bandunian els savens il sport. Ma quai saja en ina regiun perifera il destin da bleras uniuns.

Anc fin il temp da corona trenava era regularmain ina gruppa da creschids en il dojo a Raveras. Quai lessan els puspè reactivar, cunzunt cun il dialog in tar in e cun activitads visiblas. Pertge il sport da judo porschia ina scola da la vita ed ins na saja mai memia vegls da pratitgar il sport, di Rino Deflorin che fa dapi 50 onns activ judo, shiatsu e tai chi.

Or da l'archiv:

RTR actualitad 06:00

Artitgels legids il pli savens

Scrollar a sanestra Scrollar a dretga