Il gieu ha cumenzà da maniera optimala per il CDH Engiadina: Suenter gist 34 secundas han ils engiadinais gia marcà il 1:0. Be 2 minutas pli tard perfin il 2:0. La squadra da l’Engiadina Bassa ha fatg vinavant squitsch ed è i en la 15. minuta cun 3:0 en avantatg. Ma curt avant la fin dal prim terz ha Lai tratg il 3:1. En il segund terz n'hai dà nagins gols.
A la fin in gieu egualisà
En il 3. terz è il CDH Engiadina puspè i en avantatg cun 4:1. Ma lai Valbella ha reagì e tratg entaifer 3 minutas 2 gols. Uschia manava il CDH Engiadina be anc cun 4:3. En la 56. minuta ha Diego Del Andrino dentant fatg il gol decisiv al 5:3 e Lai/Valbella n'ha betg pli pudì reagir.
Betg anc salvà
Il CDH Engiadina sto ussa batter questa sonda era anc il club da hockey dad Ascona e sperar sin almain 1 terrada dal SC Küsnacht. Be uschia ha Engiadina la schanza da restar en la 2. liga. La squadra da Küsnacht gioga numnadamain anc encunter Ascona e Lai/Valbella. Sche Küsnacht guadagna quels 2 gieus na po il CDH Engiadina betg pli surpassar la sqadra turitgaisa e vegniss relegà en la 3. liga.
Hockey regiunal: Playoff e relegaziun 2. liga (2017)
RR novitads 23:00