Dapi varga quaranta onns è la cursa da stad en Engiadin'Ota, quai ch'il maraton da skis è l’enviern. Ina festa da sport da currer amez la stupenta culissa da l’Engiadina. Suenter quaranta onns ed il record da passa 2’500 curriduras e curridurs ch'eran da la partida tar l’ediziun da giubileum l’onn 2019, vulev’ins dar in nov impuls a la cursa. Durant dus onns èn ils organisaturs ids sur ils cudeschs. Questa fin d’emna è a la fin finala vegnida realisada la premiera dal St. Moritz Running Festival. Uschia sa numna la cursa ozendi.
Midada da Samedan a San Murezzan
Cun la midada dal num e la purschida ch'è vegnida schlargiada, è era vegni dischlocà la zona da l’arrivada da Samedan a San Murezzan. Uss sa chatta l’entira zona da l’arrivada sper la plazza da glatsch Ludains a San Murezzan Bogn. Tenor la presidenta dal comité d’organisaziun, Anne-Marie Flammersfeld, è quella midada sa cumprovada.
Curridurs Kenians dominescha cursa da stad
Gist tschintg curridurs Kenians èn sa rangads sin las emprimas quatter plazzas. Isaak Kipkemboi Too era il pli spert da la cursa tradiziunala dal St. Moritz Running Festival. Tar las dunnas ha gudagnà Ivana Iozzia da l’Italia. Tar la cursa da muntogna «Muragl Lauf» han curriduras e curridurs indigens procurà per las musica. Gist trais engiadinais èn sa platgads sin il podest da la cursa da muntogna Muragl. Tar las dunnas è Anita Kaufmann da Ftan vegnida segunda. Tar ils umens ha quai dà ina victoria indigena dad Isai Näff da Sent. El ha pudì far cun ses frar pli vegl Noe il pass sin il podest. Noe Näff è daventà terz.
