Durant in di dar hockey cun ils stars da la liga naziunala. Quai è pussibel durant il «Hockey Day». Al di da hockey dastgan buobas e buobs en la vegliadetgna da scolina e da scola giugar hockey cun lur gronds idols. En Engiadina organiseschan ils club da hockey da Scuol, da Samedan e da San Murezzan il di da hockey – l’inscunter d'uffants da la regiun cun ils stars da la scena.
L’interess per il di da hockey è adina fitg grond. Nus avain adina vers tschuncanta uffants che participeschan.
Empruvar da far in gol encunter il goli dal club da hockey da Tavau, Joren van Pottelberghe. U lura gudagnar in bully encunter il capitani dal HCD Andres Ambühl. Durant il di da hockey è precis quai pussibel. Ils stars dal campiun da record fan in dumengia tranter auter era il viadi en Engiadina per mussar il sport da hockey ad uffants. Dal pli pitschen als gronds, tuts ensemen sin il glatsch, e quai sco ditg cun stars da la scena naziunala.
Blers uffants che vegnan al di da hockey dattan era tar ina da las equipas dal CdH Engiadina.
Il di da hockey duess en emprima lingia esser ina gronda festa da famiglia. Suenter ch'ils uffants han pudì giugar e trenar ensemen cun ils stars datti natiralmain er la pussaivladad per ina baterlada u era per ir a la chatscha dad in autogram. Per ina giada èn ils «cracks» da la scena da hockey fitg datiers. E forsa, tgi sa, datti perfin in souvenir tut spezial dad in dals gronds idols, in guant u in pal da hockey.
RR actualitad 06:00