L’equipa indigena da curling, CC Scuol 1 de Gennero ha gudagnà il campiunadi grischun da curling a Scuol. En il final ha l’equipa cun Marco de Gennaro, Tino Andri, Domenic Zogg e Theo Biert batti l’equipa CC Scuol 4 SENTerguard cun Andri Krebs, Duri Valentin, Dario Müller e Patrice Mayer cun 9:3. L’equipa da Marco de Gennaro defenda uschia il titel gudagnà gia la stagiun vargada.
Totalmain han 16 equipas cumbattì durant dus dis per il titel da campiun grischun da curling a Scuol. Sper las sis equipas da Tavau, Claustra, Bravuogn e Filisur eran era diesch equipas engiadinaisas da la partida tar il turnier a Scuol. Las emprimas sis equipas eran tuttas da l’Engiadina.
Curling tar temperaturas miaivlas e plievgia
Damai che las temperaturas en creschidas la fin d’emna sur il punct da schelira, ha il turnier pretendì tut dal glatsch avert a Trü. La plievgia da sonda suentermezdi ha sfurzà ils organisaturs dad interrumper il turnier. Las partidas han dentant pudì vegnir terminadas la dumengia tar cundiziuns optimalas.
RR actualitad