Siglir tar il cuntegn

Header

cuntegn

Regiunal Surselva Classic segirà grazia al plan B

Ditg è el stà sin ballantscha - il Surselva Classic, ina cumbinaziun d'in event sportiv e culinaric tranter Mustér e Trun. Mo uss è l’eveniment da passlung segirà. Per garantir l'occurrenza da sonda, ils 13 da favrer, han ils organisaturs dentant stuì prender ord truchet il plan B.

Trun – Disla ed enavos enstagl da Mustér – Trun

Oriundamain vess il Surselva Classic manà da Mustér per lung la riva dal Rain fin a Trun. Mo gist sin las spundas suleglivas enturn Mustér han las temperaturas miaivlas devastà la loipa. Plinengiu en la val è la loipa dentant en in bun stan. Uschia han ils organisaturs activà il plan B. Il Surselva Classic maina ussa da Trun a Disla e puspè enavos a Trun.

audio
Mezdi: Surselva Classic segirà grazia al plan B
ord Actualitad dals 11.02.2016.
laschar ir. Durada: 3 minutas 22 Secundas.

Per l'emprima giada classic e patinar

Per l'emprima giada san ins eleger en tge moda ch'ins vul currer il Surselva Classic. Sco il num tradescha vegniva currì oriundamain en il stil classic. Da nov astg’ins era patinar. Quai saja stà in giavisch da blers di Aluis Tambornino dal comité d’organisaziun.

Cumbinaziun sportiva e culinarica

Il Surselva Classic n'è betg ina cursa. Perquai na datti era betg ina rangaziun. Igl è in eveniment sportiv cumbinà cun daletgs culinarics. Ils purs da la regiun ch'èn organisads en il center sursilvan d'agricultura porschan avant la partenza a Trun in vast solver da purs, a Disla nua ch'ins turna datti té e in pign rinforz, a Surrein in aperitiv e tar il return a Trun in gentar cun pulenta sin il fieu, fratem e dessert.

S'annunziar per il Surselva Classic pon ins sin la pagina d'internet www.nordic-surselva.ch.

Artitgels legids il pli savens