Vital Albin ha triumfà en la Val Surses tar ils umens d’elita cun in avantatg da 15,7 secundas sin Andri Frischknecht, il fegl da la legenda Thomas Frischknecht. Cumplettà il podest sco terz, cun in retard da bunamain ina minuta, ha Joel Roth, l’actual campiun d’Europa tar U23. Nino Schurter sco er Mathias Flückiger n’èn betg stads a la partenza.
Tar las dunnas ha gudagnà la gronda favurita Ramona Forchini dal Toggenburg. Ella ha distanzià l’entira concurrenza per bunamain trais minutas. Segunda è vegnida Seraina Leugger dal chantun Basilea, terza Ginia Caluori da Panaduz che parta anc cun las junioras sut 23 onns. Betg a la partenza èn stadas Jolanda Neff sco er Sina Frei, Linda Indergand u Alessandra Keller.
Er il 2023 cursas a Savognin
Malgrà la plievgia e las bassas temperaturas e cursas tras la buglia, principalmain la sonda, pon ils organisaturs guardar enavos sin ina buna fin d’emna da cursas. Passa 500 participantas e participants èn stads a la partenza a las cursas dal Swiss Bike Cup en la Val Surses, da quai passa 400 uffants.
Cun realisar questas cursas da mountainbike possian ins far pli enconuschent la Val Surses sco regiun da mountainbike, mo er gist far reclama per il Club da velo Surses ch’ha organisà las cursas a Savognin. Igl èn las sulettas cursas da questa seria da Swiss Bike Cup en il Grischun. Tenor Daniela Züger, president dal Club da velo Surses, possian ins er organisar l’onn proxim cursas dal Swiss Bike Cup al pe dal territori da skis da Savognin.