Siglir tar il cuntegn

Header

Sascha Deplazes e Markus Fehr.
Legenda: Sascha Deplazes (san.) e Markus Fehr, ciclists en la categoria masters RTR, Andreas Wieland
cuntegn

Swiss Epic 2020 Sascha Deplazes entamez l’elita mundiala

Nino Schurter n’è betg il sulet Rumantsch ch’è sin buna via da terminar il Swiss Epic 2020 sin il podest. En la categoria masters (sur 40 onns), è Sascha Deplazes ensemen cun ses collega Markus Fehr sin il segund plaz dal classament general, suenter trais da tschintg etappas.

Sascha Deplazes da Sedrun è in sportist passiunà. L’enviern fa el adina puspè furora en il sport da passlung, la stad sin il mountainbike. Ensemen cun Markus Fehr ha el era persvadì fin uss al Swiss Epic.

Gia l’emprima etappa a Laax han els terminà sco segunds. Suenter la segunda etappa ch’ha manà da Laax ad Arosa ha il duo Deplazes/Fehr schizunt astgà trair en il tricot da leader da la categoria masters.

Stretg cumbat per plazs da podest

Il cumbat per ils plazs da podest en questa categoria dals umens sur 40 onns è dentant grond. Sin ils chaltgogns dal mountainbiker da Sedrun èn tranter auter Christoph Sauser che parta ensemen cun Silvio Bundi, dus anteriurs profis da mountainbike.

Christoph Sauser ha tranter auter gudagnà als gieus olimpics a Sydney l’onn 2000 la medaglia da bronz. Plinavant ha el gudagnà 14 cursas da la cuppa mundiala ed è daventà quatter giadas campiun mundial, trais giadas sur la distanza da maraton ed ina gia en la disciplina cross-country. Christoph Sauser è er in spezialist da cursas da pliras etappas. El ha tranter auter triumfà tschintg giadas al Cape Epic en l’Africa dal Sid, la pli dira e pretensiusa cursa da mountainbike insumma, in record.

Actualitad 17:00

Artitgels legids il pli savens

Scrollar a sanestra Scrollar a dretga