Legenda:
Alex Fiva per ina giada en il tenu da golf.
RTR, Andreas Wieland
cuntegn
Swiss-Ski Golf Trophy - Profis da skis dattan golf a Lai
Top atletas ed atlets da Swiss Ski dattan per la 16avla giada golf cun lur «Flights», sponsurs che pon s’annunziar per quest turnier. Quest onn vegn la Swiss-Ski Golf Trophy organisada sin la plazza da golf a Lai. Il retgav da quest di da golf va a favur per la promoziun da talents giuvens da skis.
Da la partida èn quest onn tranter auter Marco Odermatt, l'actual star en la scena da skis. Odermatt è daventà la stagiun passada campiun olimpic en il slalom gigant ed ha gudagnà il classament general da la cuppa mundiala. Er preschent a Lai è il campiun olimpic da Peking en la cursa rapida, Beat Feuz. Plinavant dattan golf a quest turnier er Alex Fiva, il Grischun ch’ha gudagnà argient a Peking en il skicross, ils skiunzs Niels Hintermann, Luca Aerni, Thomas Tumler e Loïc Meillard. Da la partida èn dentant er anteriurs skiunzs sco Didier Cuche, Mike von Grünigen, Patrick Küng, Bruno Kernen e Walter Tresch, in dals gronds skiunzs svizzers dals onns 70 che viva dapi 11 onns a Valbella.
Legenda:
Ils anteriurs skiunzs Didier Cuche (san.) e Bruno Kernen èn oz dus gronds fans dal sport da golf.
RTR, Andreas Wieland
