En il sprint è Cédric Steiner vegnì 51avel, en la cursa da 15 kilometers in di pli tard 52avel. Gugent avess el fatg in pass enavant quest onn a las cursas da Tavau Nordic. Pervia d'ina blessura è l'indigen dentant sfurzà da persequitar sias cursas da chasa a l'ur da la loipa.
Avant in onn saja el stà extrem gnervus, cura ch’el saja arrivà en il stadion a Tavau ed el haja bunamain fatg en las chautschas, di il giuven currider grischun. Ma el saja er stà surstà quantas persunas che hajan clamà ses num, quants che hajan insumma enconuschì el. Quai saja propi stà cool, di Cédric Steiner ch’è en il cader B da Swiss Ski.
Cédric Steiner vegn ord ina famiglia fitg sportiva. Il plaschair vid il passlung ha el oravant tut survegnì pervia da ses bab ch’è stà in biatlet passiunà.
RR actualitad 17:00