Per l’emprima giada dapi duos onns ha quai puspè dat ina radunanza da las delegadas e delegads da l’Uniun grischuna da tir. A Salouf as han circa 130 dad els inscuntrads per salvar la radunanza. En quel connex ha quai gest anc dat la surdada dals premis per las tiraduras ed ils tiradurs grischuns da l’onn. Ensemen cun ina giuria ed il public èn ils nominads vegnids tschernids.
Carl Frischknecht fa la cursa
Tar l’elita era nominà il trio: Carl Frischknecht da Tumegl, Norbert Caviezel da Cuira, ed Elmar Fallet da Müstair. Fallet aveva gudagnà la distincziun sco tiradur grischun da l’onn gia quatter giadas e fiss stà l’emprim cun tschintg victorias sin il conto. Norbert Caviezel è il retg da tir actual. La concurrenza era uschia fitg auta. La fin finala ha Frischknecht fatg la cursa cun in votum cler. Il president da l’Uniun grischuna da tir era fitg surprais da questa tscherna.
Enrica Caluori victura en la sparta da juniors
La giuvna tiradura deriva d’ina famiglia che viva il sport da tir. Ella è la cusrina da la tiradura da classa Valentina Caluori. Enrica Caluori sez è vegnida la stagiun passada dubla champiunessa grischuna cun il schluppet sin la distanza da 50 meters. Enrica Caluori è dapi onns part dal cader da junioras da l’Uniun grischuna da tir.