Siglir tar il cuntegn

Header

video
Cologna: «Pudair esser sin in podest a chasa e fitg bel»
Or da Sport-Clip dals 02.01.2021.
laschar ir
cuntegn

Tour de ski: segund di Exploit da Dario Cologna en la segunda cursa dal Tour de ski

Dario Cologna è pront. Il quatterdubel victur da la seria da cursas è vegni oz en la cursa sur 15 kilometers segund. Mo Alexander Bolshunov da la Russia era anc pli spert che il Jauer.

Davent da l’entschatta ha Dario Cologna mussà ina fitg buna cursa. El era adina davanttiers preschent, era sch'il Jauer ha stuì cumbatter en quella posiziun cun in'entira armada atlets da la Russia. Surtut cun il grond favurit Alexander Bolshunov. A partir da la terza runda era quel ina classa per sai. La fin finala ha Bolshunov gudagnà cun passa 20 secundas avantatg avant Cologna. Era sch'il grischun era quasi adina davanttiers da la partida ha il meglier svizzer pudì profitar sin ils davos meters dad ina collisiun tranter dus russ. Entant Alexey Chervotkin ed Evgeniy Belov eran en la naiv da Tschierv ha Cologna pudì passar e quella schanza na s’ha ha il grischun betg pli laschà prender davent. En sia patria a Tschierv procura Dario Cologna puspè per in segn d’exclamaziun. Suenter la prestaziun dad oz è cler: Il Jauer è pront. En il classament general dal Tour è Cologna actualmain quart.

Era Jonas Baumann e Nadine Fähndrich persvadan

Sper Dario Cologna ch'è vegni segund, ha er Jonas Baumann da Lohn mussà ina ferma prestaziun. En sia segunda cursa da la stagiun ha Baumann mussà ina da las meglras prestaziuns al Tour de ski. El ha terminà la cursa sin plazza 14. Uschè ferma n'era il passlungista grischun anc mai tar ina cursa dal Tour de ski. Era sch'el ha fatg la cursa persul sent’ins la buna atmosfera en l’equipa svizra, ina atmosfera che tira l'entira equipa.

Tar las dunnas ha Nadine Fähndrich procurà per in segn d’exclamaziun tar las dunnas. Ella ha terminà la cursa sco tredeschavla.

video
Fähndrich sin plaz 13 – Svahn gudogna
Or da Sport-Clip dals 02.01.2021.
laschar ir

Gudagnà la cursa ha Linn Svahn. Laurien van der Graaff ha manchentà il top 30 e terminescha la cursa sco 40avla.

RTR novitads 12:00

Artitgels legids il pli savens

Scrollar a sanestra Scrollar a dretga