Alexander Bolshunov è per il mument l’um a batter al Tour de ski. Il passlungist da la Russia ha pudì partir cun ina minuta avantatg en la cursa da persecuziun ed Alexander Bolshunov ha quasi pudì conservar quest avantatg. Il segund, Artem Maltsev perda oz 54 secundas. Dario Cologna ha gì duas bunas rundas, nua ch'el è stà bun dad currer cun Maltsev, suenter lura ha il grischun stuì prender ora tempo. En la terza ed en la quarta runda da la cursa è Cologna anc crudà enavos sin plazza sis. Tuttina è la cursa stà ina buna per Dario Cologna. Sin ina plazza da podest perda Cologna gnanca ina mesa minuta.
Victoria dubla americana
Jessie Diggins gudogna la cursa da distanza sur 10 km en il stil liber a Tschierv. Ensemen cun Rosie Brennan ha ella procurà per ina victoria dubla. La svedaisa Frida Karlsson è vegnida terza. Linn Svahn ch'è partida sco ‘leader’ per la cursa dad oz ha pers in zichel ed è vegnida sisavla.
Nadine Fähndrich solid
Ina buna cursa ha era mussà la meglra svizra, da Lucerna. Ella ha terminà la cursa sco otgavla. Ses retard sin las pli spertas importa ina minuta e mesa.
Sin plazza otg ranghescha Nadine Fähndrich era per il mument en il classament general dal Tour. Sin las passlungistas e sin ils passlungists spetga uss in di da paus. Il Tour de ski cuntinuescha il mardi cun las cursas da distanza a Toblach en il Tirol dal Sid.
