Adrian Castrischer è il grond victur da l’emprim Swissalpine a Flem. Il Bernais da 35 onns ha gudagnà a moda suverana la cursa da passa 80 kilometers cun dapli che 4’000 meters differenza d’autezza, quai en in temp da 9 uras ed 11 minutas. Castrischer è uschia stà bun 50 minutas pli svelt ch’il segund, Thomas Suter da Baden e gia passa in’ura pli svelt ch’il Svedais Daniel Bränholm.
Tar las dunnas ha Esther Dissler da Nottwil gudagnà en 12 uras e 10 minutas ed uschia battì la segunda, Isabelle Stich da Turitg per bun 12 minutas.
Rangaziun Swissalpine Flem 2025
La cursa roiala ha cumenzà la damaun a las 4:00 ed ha manà dal Center da sport Prau la Selva direcziun Lag da Cauma fin en la Ruinaulta, il Grand Canyon da la Svizra. Lura èsi ì ensi sin l’Alp Mora sur Trin fin ils mulins da glatscher. Vinavant ha il viadi manà a Bargis sur il Crap da Flem en la regiun da Sardona, Patrimoni natiral mundial da l’UNESCO. Il proxim punct culminant è stà Segnesboden, in dals lieus centrals da la pendiculara dal Flemxpress. Via Nagens ha la cursa K82 manà sin il Crap Masegn. Via Crap Sogn Gion e Falera han curridras e curriders lura prendì en mira l’arrivada a Flem.
Dapli annunzias che spetgà
Tut en tut èn stads a la partenza 631 curridras e curriders. La gronda part ha prendì part a la cursa K43 sur la distanza da maraton cun bunamain 1'800 meters d'autezza. Questa cursa ha Christian Mathys d’Oberdorf gudagnà tar ils umens en 3:47 uras ed Isabel Lane da Kilchberg tar las dunnas en 5:04 uras. Era sa participads a questa cursa èn tranter auter Iris e sia figlia Selina Deplazes da Rabius. Ellas duas han duvrà bun 6:30 uras per il K43.
Plinavant hai anc dà cursas sur las distanzas da 17 e 14 kilometers, cunzunt cursas idealas per novizs dal sport da trailrunning.
Il Swissalpine aveva festivà sia premiera il 1986 a Tavau. Durant 36 onns ha questa cursa gì là gronda tradiziun e s'etablida tar ina da las grondas ed impurtantas cursas en l'Europa. Suenter quatter onns pausa ha la cursa d’Andrea Tuffli, il bab dal Swissalpine, dà quest onn ses comeback, quai en la regiun da Flem Laax.
Facit positiv dal «nov» Swissalpine a Flem
Il comité d'organisaziun tira in facit positiv da la premiera dal Swissalpine a Flem. Cun 630 curridras e curriders ch'èn la finala ids a la partenza ad ina da las differentas cursas sajan els pli che cuntent, uschia Livio Bieler. En vista al 2026 possian els dentant anc megliurar la signalisaziun da la ruta e porscher anc dapli posts da nutriment.
Novitads, eveniments ed istorgias localas. Tut tge che curra e passa en la Surselva chattais vus qua.
