Marta Bundi da Zignau ha 63 onns e sa prepara actual cun l'equipa naziunal da las dunnas che train rudella per il campiunadi europeic en Germania. Scuvert il sport ha la Sursilvana casual, ad in di polisportiv da ses uffants. Ella è stada intgantada e dapi ch'ella ha 50 onns pratitgescha ella il trair rudellas be mo sco hobi, mabain professiunal.
Cu jau dun rudellas emblidel tut enturn mai.
Marta Bundi è ina da paucs en Svizra cun licenza per quest sport. In sport che vegn giugà l'entir onn. L'enviern sin il glatsch ed il rest da l'onn sin catram.
In gieu cumplex che dovra tecnica e tactica
Tar il trair rudellas datti pliras disciplinas. En Svizra èn las pli derasadas quellas d'equipa e la categoria da precisiun. La rudella ha plattas da gummi da diversas colurs che vegnan brattadas ora. Mintgina da diversa sveltezza cura ch'ella fila sur il glatsch. Er il moni elegia mintga giugadura individual.
Buna gnerva e leger bain il gieu èn mias fermezzas.
In turnier da trair rudellas cuzza pliras uras. Munta pia ch'i dovra surtut fermezza mentala per sa concentrar sur in lung temp. Per avair success ston era la tecnica e la tactica armonisar e betg il davos il pensar strategic.
Argient europeic ed aur mundial
L'onn 2019 han las dunnas da l'equipa naziunala fatg surstar il mund da trair rudellas. Al campiunadi europeic en Lituania han ellas gudagnà la medaglia d'argient. Quai è schon quasi stà ina sensaziun. Ellas han battì duas fermas naziuns en quest sport. Las Talianas e las Austriacas. Be las Tudestgas ch'èn idas per il titel èn stadas pli fermas. Avant dus onns hai lura perfin dà la medaglia dad aur. Quai en la categoria B dal campiunadi mundial en Italia.
Cler che quels success leventan las ambiziuns per il proxim campiunadi europeic ch'è il cumenzament da mars en Germania. Ins na vul dentant betg far squitsch, di Marta Bundi. Gliez na saja mai bun per propi avair success e puspè cumbatter per ina medaglia. Abstrahà cun l'equipa cumbatta Marta Bundi er en il singul a quest campiunadi europeic. Ses siemi è da dumagnar là fin en il final.
![5 sportistas cun medaglia d'aur](https://www.rtr.ch/static/cms/images/960w/2fa020.jpg)
Turnier a Sursaissa
En in onn cun in eveniment grond emprovan las damas da l'equipa naziunala da giugar dapli turniers per praticar propi il cumbat. Quai na possian ins betg simular en ils trenaments. Cunquai ch'ellas èn spatitschadas in pau dapertut en la Svizra na s'entaupan ellas betg uschè savens per trenar. Mintgina trenescha dentant individual en ses club. Marta Bundi en il club da trair rudellas da Sursaissa. Quel ha organisà dacurt in turnier nua che set equipas èn sa mesiradas. Equipas maschadadas ed era be dad umens ed era ellas, sco equipa naziunala han prendì quella chaschun. Il turnier è la finala ì a fin per ellas sin il quart plaz.