Siglir tar il cuntegn

Header

cuntegn

Transviamala 2018 In nov retg ed ina nova regina

Ralf Birchmeier da Buchs SG è il nov retg e Melina Nigg da Küssnacht am Rigi la nova regina da las chavorgias. Omadus han suenter il maraton da trail da Glion a Tusaun er persvadì il di suenter al Transviamala sur 19 kilometers da Tusaun a Donat.

A Ralf Birchmeier – ch’ha gudagnà la cursa roiala dal Transruinaulta cun in nov temp da record (3:15.02 uras) – ha in 7avel plaz tanschì al Transviamala per gudagnar la cumbinaziun da questas duas cursas. La finala ha il currider da 36 onns anc gì in avantatg da bun duas minutas e mesa sin ses pli grond concurrent, Raphael Sprenger da Turitg ch’è vegnì segund al Transruinaulta e terz al Transviamala.

audio
Melina Nigg e Ralf Birchmeier, retg e regina da las chavorgias 2018
04:13 min, Sportissimo dals 21.10.2018.
laschar ir. Durada: 04:13 minutas.

In success cumplain

Dubel motiv da far festa en la Val Schons ha Melina Nigg gì. Suenter ses segund plaz al Transruinaulta ha ella gudagnà be in di pli tard il Transviamala ed uschia era la cumbinaziun. Nigg ha dentant er profità che la gronda favurita e defensura dal titel, Michela Segalada da Winterthur, ha stuì dar si il Transviamala pervia d’ina blessura. Uschia han las duas chavorgias Ruinaulta e Viamala ina nova regina fin la proxima ediziun l’october 2019.

audio
Andreas Wieland cun impressiuns da la cursa Transviamala
10:46 min, Sportissimo dals 21.10.2018.
laschar ir. Durada: 10:46 minutas.

Sco gia avant trais onns

Currì il pli spert tras la Viamala è quest onn Arnold Aemisegger dal Principadi dal Liechtenstein. Il victur dal 2015 ha duvrà per ils 19 kilometers da Tusaun fin a Donat 1:20.38 uras ed è uschia stà quasi sin la secunda uschè svelt sco tar sia davosa victoria avant trais onns. Quest onn ha Aemisegger gudagnà cun in avantatg da 50 secundas sin Tommy Manning da Montagnola.

audio
Arnold Aemisseger gudogna il Transviamala 2018
02:25 min, Sportissimo dals 21.10.2018.
laschar ir. Durada: 02:25 minutas.

Jonas Baumann cun nov record

Il passlunghist Jonas Baumann da Lon ha gudagnà la Transviamala Curta. Il matador local ch’ha gudagnà pli baud pliras giadas la cursa da Schons ed er ina giada la cursa roiala dal Transviamala ha duvrà per ils 11,5 kilometers da Tusaun a Donat 49.53 minutas. Cunquai è Baumann l’emprim currider insumma che dumogna questa cursa cun in temp da sut 50 minutas. Il passlunghist ha uschia er demonstrà tar sia cursa da chasa ch’el è pront per la nova stagiun d’enviern.

audio
Jonas Baumann ina classa per sasez avant ses isch-chasa
04:44 min, Sportissimo dals 21.10.2018.
laschar ir. Durada: 04:44 minutas.

Tar las dunnas ha Bernadette Betschart-Gisler gudagnà la Transviamala Curta. La curridra da Bürglen en il chantun Uri è uschia er l’emprima princessa da las chavorgias. Ella ha gudagnà la cumbinaziun da la Transruinaulta Curta da Glion fin a Razén e la Transviamala Curta. L’emprim prinzi da la chavorgias è daventà Remo Betschart ch’era daventà avant in onn il retg da las chavorgias. Remo Betschart è l’um da Bernadette, uschia che las duas curunas da prinzi e princessa restan en famiglia.

audio
Nadja Schmed da Breil ha absolvì omaduas cursas curtas
03:08 min, Sportissimo dals 21.10.2018.
laschar ir. Durada: 03:08 minutas.

Ina fin d’emna perfetga

Las cursas dal Transruinaulta e Transviamala èn stadas ins success cumplain. Aura perfetga, ina culissa magnifica, cun passa 2’000 participants in nov record, nagins pli gronds incaps ed ina grondiusa festa en la Val Schons. Il president dal comité d’organisaziun, Thomas Häusermann, è pli che cuntent cun l’ediziun 2018 e chatta be pleds positivs. Tuttina saja la finamira d’adina vegnir megliers per uschia porscher a las curridras ed als curriders cursas uschè perfetgas sco mo pussibel. Las proximas cursas dal Transruinaulta e Transviamala èn ils 19 e 20 d’october 2019.

audio
Thomas Häusermann, president dal OK, fa bilantscha positiva
00:39 min, Sportissimo dals 21.10.2018.
laschar ir. Durada: 00:39 minutas.

RR Sportissmo 17:00

Artitgels legids il pli savens

Scrollar a sanestra Scrollar a dretga