Jan Hafner da Cuira è il nov «retg» ed Angela Gisler da Flüelen el chantun Uri la nova «regina da las chavorgias». Omadus han gudagnà la fin d’emna la cumbinaziun da la cursa Transruinaulta da Glion a Tusaun sur la distanza da maraton e da la cursa Transviamala da Tusaun a Donat sur 19 kilometers.
Marco Wildhaber da Tusaun, il retg dals davos dus onns, ha gudagnà quest onn il titel da «prinzi da las chavorgias». El ha gudagnà la cumbinaziun da la cursa Transruinaulta curta da Glion a Razén sur 24 kilometers e la cursa Transviamala sur 11 kilometers. La nova «prinzessa» è Sina Sprecher dal chantun Berna.
Transruinaulta e Transviamala 2025
Transviamala 2025
Il pli spert da la cursa Transviamala sur la distanza roiala da 19 kilometers ch’è vegnida organisada quest onn gia per la 23avla giada è stà Anrold Aemisegger dal Principadi dal Liechtenstein, quai en in temp da 1:30:01 uras. Tar las dunnas ha Gianna Chiara Wohler da Spiez triumfà (1:43:13 uras), quai avant sia sora Carla Wohler.
Thomas Häusermann surdat las hottas en novs mauns
Tut en tut èn stads a la partenza la dumengia bun 1000 curridras e curriders. I saja stà ina fin d’emna perfetga cun bell’aura, ina culissa magnifica ed in mantun participantas e participants fitg cuntents, uschia Thomas Häusermann.
El ha presidià per la davosa giada questas cursas Transruinaulta e Transviamala. Tut en tut è Häusermann stà 25 onns en il comité d’organisaziun, ils davos 14 onns sco president. El ha cunzunt clamà en vita avant 11 onns la cursa Transruinaulta cun partenza a Glion ed arrivada a Tusaun. Tgi che daventa successur da Thomas Häusermann sco president n’è anc betg enconuschent.
Transruinaulta 2025
L’Engiadinaisa Flurina Eicholzer ha gudagnà la cursa da Glion a Tusaun en 3:37 uras – in nov record. Tar ils umens ha Jan Hafner triumfà.
Premiera e gist victoria per Jan Hafner
Emprima giada a la partenza e gia l’emprima victoria al Transruinaulta. Jan Hafner (29 onns) da Cuira ha gudagnà la cursa roiala sur la distanza da maraton da 42,2 kilometers cun 1800 meters differenza d’autezza da Glion a Tusaun. Hafner fa part al BTV Cuira e parta er la dumengia al Transviamala da Tusaun a Donat. El ha uschia las meglras cartas da daventar il nov «retg da las chavorgias».
- Jan Hafner, Cuira 3:31:20,5 uras
- Enzo Landry (Frantscha), Feldkirch, +2:00,5 minutas
- Fabien Von Bergen, Wetzikon +5:29,5 minutas
Flurina Eichholzer defenda sia victoria
Tar las dunnas ha Flurina Eichholzer pudì defender sia victoria da l’onn passà. Quest onn è la sportista da Zernez però stada 20 minutas pli sperta ch’il 2024 ed ha distanzià l’entira concurrenza per passa mes’ura. Eichholzer ch’ha 43 onns ed è mamma da dus uffants na parta dentant betg la dumengia al Transviamala. En il cumbat per il titel da regina da las chavorgias ha uschia Angela Gisler da Flüelen las meglras schanzas.
- Flurina Eichholzer, Zernez 3:37:21,1 uras
- Angela Gisler, Flüelen +35:09,4 minutas
- Marlen Gisler, Rickenbach B. Schwyz +40:37,2 minutas
Cursa curta da Glion a Razén
La cursa Transruinaulta curta sur 24 kilometers cun 780 meters differenza d’autezza da Glion a Razén han gudagnà tar ils umens Marco Wildhaber da Tusaun (1:46.14 uras) e tar las dunnas Sina Sprecher da Berna (2:08.45 uras).
Tut en tut èn radund 730 curridras e curriders stads a la partenza dal Transruinaulta 2025. Bunamain 300 han fatg part a la cursa roiala da Glion a Tusaun.