Siglir tar il cuntegn

Header

video
Camp da hockey a Scuol
Or da RTR Social dals 16.07.2022.
laschar ir. Durada: 29 Secundas.
cuntegn

Trenar hockey la stad Nov record tar il camp da hockey a Scuol

Il camp da hockey per uffants e giuvenils a Scuol ha ina lunga tradiziun. Durant in’emna fugian ils uffants e giuvenils da las chaliras da la stad e van sin il glatsch. Quest onn uschè blers sco anc mai. Circa 60 uffants e giuvenils èn stads da la partida.

Gia dapi blers onns organisescha il Club da hockey Engiadina il camp da hockey durant la stad. Uffants e giuvenils da la regiun, dentant er dad autras parts da la Svizra e da l’ester emprendan durant in’emna anc meglier lur sport. Il camp da hockey porscha trenament en tut ils secturs da hockey. Quai cumenza cun ir cun ils patins, sur il trair, fin tar il trenar il gieu da posiziun e sa chapescha il giugar. Ils uffants e giuvenils ch'èn da la partida vivan durant in emna il sport da hockey.

audio
Uffants e giuvenils treneschan hockey a Scuol
ord Actualitad dals 16.07.2022.
laschar ir. Durada: 3 minutas 59 Secundas.

Trenaders professiunals accumpognan ils uffants

Sut la batgetta dals trenaders da las equipas da hockey engiadinaisas, Benny Wunderer ed Alexander Aufderklamm ha lieu il camp da hockey a Scuol. Sper ils trenaders dal Cdh Engiadina e da l'EHC San Murezzan sustegnan er anc in trenader da golis, in trenader da l'academia da hockey da Salzburg ed ina fisioterapeuta il camp. E tranteren gidan era anteriurs giugader da hockey dal Cdh Engiadina durant l’emna da hockey, sco il goli Florian Haller dad Ardez.

Jau tir il chapè da mintga participant dal camp da hockey. Il program durant quest’emna è fitg stretg.
Autur: Benny Wunderer trenader da hockey

Forsa resta in u l’auter fidaivel al hockey

L’emna da hockey en Engiadina vul meglierar la qualitad dals uffants e giuvenils sin il glatsch. Ina da las finamiras dal camp è era da vulair svegliar tar in u l’auter la passiun per il hockey, e forsa che in u l’auter prenda perfin en mira ina carriera professiunala da hockey. Ils organisaturs dal camp da hockey dian dentant era:

Sch'i sa sviluppa mo ina amicizia durant quest’emna, avain nus gia cuntanschì ina massa.
Autur: organisaturs dal camp

RTR actualitad 17:00

Artitgels legids il pli savens

Scrollar a sanestra Scrollar a dretga