Siglir tar il cuntegn

Header

cuntegn

Trun/Rabius – Schluein Glion Fevra da derbi e finamiras differentas

En terza liga vegni gia en il segund gieu da la runda da primavaira tar il derbi tranter il CB Trun/Rabius e l'US Schluein Glion. Emoziuns e tensiun garantidas, sin e sper il plaz. Abstrahà dal derbi che nagin vul perder, èn las finamiras dals dus clubs fin la fin da la stagiun pulit differentas.

Las plazzas da ballape regiunalas survegnan puspè vita. La runda da primavaira cumenza per las diversas ligas. En la terza liga ha ella gia cumenzà l'ultima fin d'emna. E gia uss dumengia, ils 2 d'avrigl a las 15:00, vegni en Surselva tar il derbi tranter il CB Trun/Rabius e l'US Schluein-Glion.

Schluein Glion e la missiun promoziun

La finamira dals da Schluein Glion è clera. Terminar la stagiun a la testa da la tabella e turnar en segunda liga. Da quella segunda, ch'els èn vegnids relegads a la fin da l'ultima stagiun. Dapi l'ultima fin d'emna è il club da la Foppa il nov leader en terza liga. Quai suenter in gieu fulminant cun batter ils da Triesen gist cun 6:2. Quai saja la cumprova d'avair trenà minuzius durant la pausa d'enviern, uschia il trenader Corsin Cavegn.

audio
US Schluein Glion: Corsin Cavegn davart la missiun promoziun
ord Actualitad dals 31.03.2023. Maletg: RTR
laschar ir. Durada: 4 minutas 13 Secundas.

Actual po Corsin Cavegn disponer dad in cader cumplet da 22 giugaders, tge che saja legraivel ed impurtant sin la «missiun promoziun». Quella aviseschan era auters clubs. Tranter ils emprims quatter en la tabella èsi in stretg cumbat. Perder massa blers puncts en ils gieus da return na poi betg vertir. Sco pli grond concurrent da l'US Schluein Glion en il cumbat per far il pass en segunda liga numna il trenader il club da Ruggel dal Principadi dal Liechtenstein.

Trun/Rabius e la missiun final Cuppa grischuna

Ina da las grondas finamiras dal CB Trun/Rabius en questa stagiun è da cuntanscher il final da la Cuppa grischuna. Quel vegn giugà il di d'Anzainzas en la chapitala a Cuira. Per pudair cumbatter per quella trofea sto l’equipa da la Cadi anc batter en il mezfinal a chasa Valposchiavo Calcio, in’ulteriura equipa da terza liga.

audio
CB Trun/Rabius: Clau Berther davart trenaders e finamiras
ord Actualitad dals 01.04.2023. Maletg: RTR
laschar ir. Durada: 4 minutas.

Manar a quai success duain ils trenaders Roland Decurtins e Clau Berther ch’han surpiglià l’equipa ad interim. Ils anteriurs trenaders Donat Albin e Philippe Vincenz han suenter la runda d’atun definitiv dà giu il timun. Cun il duo Decurtins e Berther ha il club lura chattà ina schliaziun per la runda da primavaira. Ed a la fin da quella vul il club da la Cadi esser entamez la tabella. Avant ch'il nov a la lingia surpiglia, Claudio Bundi da Glion.

In derbi che nagin vul perder

Il derbi da l'atun è anc pulit preschent, in derbi ch'ils da Schluein Glion han gudagnà a chasa cun 2:1. Ina partida ch'avess era pudì crudar a favur dals da Trun/Rabius. Il club da la Cadi era perfin ì en avantatg suenter be tschintg minutas. Era sche Schluein Glion va sco favurit en quest derbi, èn ins conscients ch'i na vegn betg simpel.

audio
L'US Schluein Glion avant il derbi cunter il CB Trun/Rabius
ord Actualitad dals 31.03.2023. Maletg: RTR
laschar ir. Durada: 3 minutas 20 Secundas.
Nus essan la ferma equipa e stuain gudagnar.
Autur: Lars Caduff attatgader US Schluein Glion

Uschia tuni tar ils giugaders da l'US Schluein Glion. Els che dovran era quests trais puncts sin lur missiun da turnar en segunda liga. Sco leader en la tabella èn els ils chatschads e stoppian era far il gieu. Tuts sajan conscients da quai che spetgia. In derbi cun blers gols na vegn era questa giada betg spetgà.

«Nus na regalain betg puncts a Schluein»

Tenor il trenader Clau Berther stoppia il CB Trun/Rabius simplamain dar defensiv fitg bain e mirar da survegnir nagins gols, quai che saja ina gronda sfida encunter quai power offensiv da Schluein Glion. Lura stoppian els franc era avair in zic cletg, il sustegn dals fans e guardar da tegnair sut controlla las emoziuns che tutgian dentant tar in tal derbi.

audio
Il CB Trun/Rabius avant il derbi cunter l'US Schluein Glion
ord Actualitad dals 01.04.2023. Maletg: rtr
laschar ir. Durada: 3 minutas 36 Secundas.
Sin il palpiri èsi ina clera chaussa, nus n’avain da perder nagut.
Autur: Clau Berther trenader CB Trun/Rabius

Trun/Rabius encunter Schluein Glion n'è betg sulet in gieu tranter las actual fermas equipas en Surselva, mabain er in duel tranter buns amis sper il plaz e rivals sin il plaz ed era in duel tranter Rumantschs.

RTR actualitad 07:00

Artitgels legids il pli savens