La tensiun en segunda liga da hockey resta. Entant che las autras duas equipas grischunas, Lai-Valbella ed il EHC San Murezzan èn segiras da la partida en ils playoffs, ha la terza equipa grischuna, il CdH Engiadina da tremblar. Actualmain è l’equipa da l’Engiadina Bassa cun be in punct avantatg sur il ominus stritg da la segunda liga, ed uschia da la partida en ils playoffs. I resta dentant anc ina partida da qualificaziun ed il SC Weinfelden ch'ha be in punct damain sin ils chaltgogns dals engiadinais.
La partida tranter l'EHC San Murezzan ed il SC Weinfelden da mardi saira ha l'equipa engiadinaisa gudagnà a chasa cun 4:3.
Plazza da playoff vul dir ch'ins è salvà en la segunda liga
Ina plazza da playoff en segunda liga da hockey è perquai uschia impurtanta, perquai ch’ella segira ina plazza en questa liga. L’equipa che terminescha la qualificaziun sin plazza nov ha da dar partidas da relegaziun per restar en segunda liga. La tensiun resta pia e la davosa partida decida.
Cun ina victoria en l’ultim gieu è tut cler
Sch'il CdH Engiadina gudogna l’ultima partida da la qualificaziun è tut cler. Lura è tuttina tge ch'il SC Weinfelden fa. Sche Engiadina va en la prolungaziun e gudogna pir lura è l’equipa da l’Engiadina Bassa anc adina qualifitgada per ils playoffs. Sch'Engiadina perda il davos gieu ed il SC Weinfelden gudogna, lura è l’equipa dal chantun Turgovia da la partida en ils playoffs. E per finir datti anc la varianta che omadus equipas han tuttina blers puncts suenter la qualificaziun. Lura decidan ils duels directs tranter il CdH Engiadina e Weinfelden. E quel duel pleda per il CdH Engiadina che ha gudagnà omadus partidas. La davosa partida da qualificaziun dat il CdH Engiadina la sonda saira ordaifer cunter Illnau-Effretikon, il SC Weinfelden gioga a chasa cunter Dürnten.