Ursin Spescha che parta dapi intgins onns per il Bike Team Soloturn, quai ensemen cun ses collega Vital Albin da Tersnaus, ha gudagnà en questa stagiun ses emprims puncts da la cuppa mundiala dals U23.
En sia davosa cursa da la Hors Catégorie en la Pologna ha Ursin Spescha schizunt fatg il pass sin il podest sco terz davos l’American Christopher Blevins e l’Ollandais David Nordemann, dus ch’han anc gudagnà dacurt a Lai ina medaglia al campiunadi mundial.
Pass per pass enavant
Ursin Spescha ha fatg in grond svilup ils davos onns. Il giuven da 20 onns ha lavurà e trenà fitg, er mental. Mo il principal saja ch’ins haja grond plaschair dad ir cun il mountainbike, di Ursin Spescha, quai saja la basa dal success. Plinavant sa sentia el er fitg bain en il Bike Team Soloturn.
Ils davos trais onns abitava Ursin Spescha a Soloturn ed ha er fatg là in emprendissadi mercantil. Dacurt è el puspè turnà enavos en Surselva.
La sfida da cumbinar mountainbike e matura da professiun
Sper igl ir cun mountainbike fa Ursin Spescha ussa anc la matura da professiun a Turitg. Avair insatge sper il sport fetschia bain, di Ursin. Il grev saja simplamain da parter en bain il temp per uschia er pudair trenar il pli optimal. Ussa saja dentant temp per far vacanzas avant che lantschar la preparaziun sin la nova stagiun 2019.
RR Sportissimo 17:20