La nova halla è in project dad 1,5 milliuns francs dal Club da lutga Unterlandquart che vegn er sustegnì dal chantun cun 275’000 francs. La gronda part da las lavurs vegn dentant fatga dals lutgaders e commembers dal club. Sonda per sonda èn Armon Orlik e collegas uschia sin il bajetg a Vaz Sut.
Cun questa halla sperain nus er da carmalar novs lutgaders en il resgim, principalmain lutgaders giuvens.
Il bajetg è sin pes. Uss, il proxim temps spetgan anc lavurs internas, plinavant èsi da metter lingias d’aua e d'electricitad e viaden en la stad duess la nova halla da lutga esser a fin. Il coc da questa halla è la surfatscha da lutga sin 260 m² che sa chatta sin il plaun terren. Sin il plaun sura datti ina segunda halla polisportiva sin ina surfatscha da 230 m². E sin il plaun sutterran èn gardarobas, duschas e tualettas. Plinavant datti anc ina stanza d’inscunter cun ina vista sin il resgim.