La basa per ina buna carriera en il sport da mountainbike han Albin sco Schurter cuntanschì tar il Club da velo Surselva.
Nino Schurter saja ses grond idol. Vegnir ina gia uschè ferms sco Schurter saja la gronda finamira. El lavuri di per di persuenter, di Vital Albin. Mo far in di ina carriera sco quai che Nino Schurter haja fatg saja fitg grev, damai che ses idol haja gudagnà tut quai ch’i dettia da gudagnar en il sport da mountainbike, manegia Vital Albin ch’ha lantschà sia carriera tar il Club da velo Surselva ed è dapi prest trais onns commember dal Bike Team Soloturn. Il Club da velo Surselva haja mess durant ses giuvens onns blera paisa sin la tecnica, quai che saja la basa en il sport da mountainbike e la clav per avair success. Il Bike Team Soloturn saja ussa la porta per ina carriera sco mountainbiker.
Sco junior in dals megliers dals megliers
Ils davos onns ha Vital Albin festivà gronds success. Tranter auter è el vegnì quatter giadas en seria campiun svizzer, duas giadas tar ils U17 e duas giadas tar ils U19. L’onn passà è Albin plinavant er vegnì vice-campiun mundial e vice-campiun d’Europa en la disciplina cross-country tar ils U19. Dapi quest onn parta Vital Albin tar ils U23. Sia finamira per il 2017 saja da gudagnar ina medaglia als campiunadis svizzers e da sa qualifitgar per ils campiunadis mundials dals U23 en l’Australia.
Ses nov da chasa a Soloturn
Dapi trais onns abitescha Vital Albin amez la citad da Soloturn, quai en ina abitaziun cun dus buns collegas – tranter auter cun Ursin Spescha da Sevgein ch’è tuttina vegls e ch’el enconuscha dapi ses temp tar il Club da velo Surselva. Spescha metta sco Vital Albin era tut sin la carta mountainbike ed è medemamain commember dal Bike Team Soloturn. Sper il trenar frequenta Vital Albin il gimnasi da sport a Soloturn, ina scola che pussibilitescha ad el da trenar minuziusamain sper la scola. Il giuven mountainbiker è sa decidì per ina scola en la Bassa per uschia er pudair trenar sin il velo durant ils mais d’enviern.
Per il success sto tut constar
Durant l’enviern treneschia el dapli uras, perencunter betg uschè intensiv, di Vital Albin. Intgins mais avant che la nova stagiun giaja liber vegnia lura cumenzà cun trenaments pli e pli intensivs, er per vegnir pli explosivs. Per avair success stoppia lura tut constar: Ins stoppia esser fits, avair ina buna tecnica ed er esser mental top fit – ina da las grondas fermezzas da Vital Albin cun sia ruassaivladad. Durant la cursa stoppia lura er anc il material constar ed i dovria sa chapescha er in zic cletg da betg avair defects.
Bike Team Soloturn
Tar ils juniors ha Vital Albin fatg furori ed ha demonstrà pliras giadas tge grond potenzial ch’el ha. Per er pudair tegnair pitg cun ils mountainbikers d’elita dovri dentant anc in zic, manegia il giuven da Tersnaus. El stoppia trenar anc dapli ed er anc perfecziunar ina u l’autra chaussa per ina gia propi star sin la roda davos a ses idol Nino Schurter.
