Il Grischun ha per l'emprima giada in retg da lutga. Armon Orlik ha encurunà sia carriera cun la victoria a la festa federala da lutga a Mollis en il chantun Glaruna.
Il Grischun è losch dad Armon Orlik – spezialmain las abitantas ed ils abitants da ses vitg nativ. RTR ha sentì il puls a Maiavilla suenter la victoria da lur lutgader.
Il temp suenter la festa federala è dentant stà quasi uschè intensiv sco la festa sezza, ha declerà il retg da lutga Orlik. Ils davos bun trais mais è l'um cun ragischs en Surselva stà dumandà. Qua in termin, là in inscunter – tut ch’ha vulì insatge dal nov retg da lutga. Mo uschiglio na saja betg sa midà bler en sia vita, ha declerà il lutgader da 30 onns. El è però daventà anc pli popular ed è uss anc dapli en il focus.
Sin nivel sportiv na saja betg sa midà bler. Dapi bun in mais ha Orlik puspè cumenzà a trenar, quai sco usità, fitg disciplinà e consequent, e cun la medema glieud. Armon Orlik resta fidaivel a ses trenader atletic Robin Städler, l’Engiadinais ch’ha contribuì bler a quest success. La finamira è da defender il titel da retg da lutga il 2028 a Thun.