La Svizra ha la pli gronda delegaziun
Als gieus èn sa participads 669 atlets ed atletas da 28 pajais. Da quel temp n'era l'egualitad anc nagin tema: be 77 atletas èn sa participadas. Ellas han cumbattì en il ski alpin ed il patinadi artistic. Da tut ils pajais è la delegaziun da la Svizra stada la pli gronda. Cun 70 atlets ed atletas è la Svizra stada represchentada cun ina persuna dapli ch'ils Stadis Unids. Da l'autra vart da la glista sa chatta la Grezia: be in atlet.
Tar ils ultims gieus olimpics d'enviern a Beijing 2022 èn sa participads 2'834 atlets ed atletas da 91 pajais. Pia dapli che quatter giadas uschè blers participants.
Las disciplinas
Als gieus olimpics da 1948 hai dà 22 concurrenzas en las disciplinas:
- Bob (da dus e da quatter)
- Hockey sin glatsch
- Patinadi artistic (umens, dunnas, mixed)
- Patinadi da sveltezza (500, 1'500, 5'000 e 10'000 meters)
- Cumbinaziun nordica
- Skeleton
- Ski alpin (cursa rapida, cumbinaziun, slalom) mintgamai umens e dunnas
- Passlung (18 e 50 kilometers, staffetta 4x10 kilometers)
- Siglir cun skis
Sco il dumber da participants e participantas è er il dumber da concurrenzas creschì enorm. A Beijing hai dà quasi tschintg giadas uschè bleras concurrenzas: en tut 109.
Pentatlon d'enviern – ina giada e mai pli
Dasper il skeleton, ch'è pir l'onn 2002 puspè stà part dals gieus olimpics a Salt Lake City, ha il pentatlon d'enviern be gì ina curta carriera olimpica. Il 1948 è stà l'unica giada che la concurrenza è stada part da gieus olimpics – quai be sco emprova. Uschia n'ha la concurrenza er betg dà medaglias – quellas fissan dal reminent tuttas idas en Svezia. Las disciplinas dal pentatlon eran:
- 10 kilometers passlung
- sajettar cun pistola
- cursa rapida
- dar spada
- sigl d'obstachels a chaval
Per ils fans da datas
Ina survista dals pajais ch'èn stads participads als gieus olimpics cun il dumber d'atlets ed il spievel da medaglias. La successiun da la tabella pudais midar cun in clic sin il titel da mintga colonna:
Or da l'archiv:
Ina da las persunas ch’ha lavurà per l’organisaziun dals gieus olimpics il 1948 a San Murezzan è Marcella Maier (1921-2018). Ella ha raquintà 2018 da sias regurdanzas.
Er sche la televisiun era da quest temp per gronda part be nair ed alv, hai dà documents videografics en colur.
