Il spezialist da slalom è la fin da schaner 2021 stà sin il podest dal slalom da Chamonix. Quest resultat en la cuppa mundiala saja la motivaziun per cuntinuar la carriera – er sch'el na saja betg pli part d'in cader da Swiss Ski.
Il skiunz surmiran da 28 onns è questa primavaira crudà or dal cader, ils resultats na sajan simplamain betg stads buns avunda la stagiun passada per giustifitgar ina selecziun. Sandro Simonet è pront d'investir sia energia, dentant er daners en ses siemi. Uschia saja ussa da guardar da stagiun a stagiun e natiralmain er da sclerir ed organisar tut sez. Quai saja ina sfida, dentant er ina schanza. Sco quai ch'il skiunz surmiran ha ditg envers RTR, quinta el cun custs da 60'000 – 80'000 francs ch'el stoppia ussa purtar sez. El speria da chattar sponsurs per pudair cuvrir ina part da ses custs. Era veglia el lantschar in'acziun da crowdfunding, ha el ditg plinavant.
