«Hockey goes to school», uschia as numna il project da la federaziun svizra da hockey che vul mussar il sport da hockey a scolaras e scolars. Durant ils davos dus onns è la federaziun svizra da hockey vegnida en las scolas da l’entira svizra per mussar a las scolaras ed als scolars in per exercizis da hockey. Quellas lecziuns èn adina stadas en las salas da gimnastica da las differentas scolas. Uss va ins en Engiadina Bassa la via cuntraria. Enstagl dad ir tar las scolas, vegnan las scolas en la halla da glatsch da Gurlaina.
Radund 200 scolaras e scolars treneschan hockey
L’idea dad ir la via cuntraria è vegnida dal trenader dal Cdh Engiadina, Benny Wunderer. El ha dumandà las scolas en Engiadina Bassa sch’ellas vessan interess da vegnir ina giada cun lur scolaras e scolars da las emprimas duas classas en la halla da glatsch da Gurlaina per in trenament. E las scolas eran dalunga intgantadas da questa idea. Uschia vegnan uss durant in emna radund 200 scolaras e scolars da las scolas da Valsot, da Scuol, da Sent, dad Ardez ed era da Zernez en la halla da Gurlaina a Scuol per in trenament da hockey.
Tut la mandura e pronta
Las scolaras ed ils scolars na han dad organisar nagut. Patins en tut las grondezzas, dentant er chapellinas, manetschas, protecturs, bastuns e tricots sun pronts. Ils uffants pon uschia propi giudair duas uras sin il glatsch ensemen cun l’entira classa. E forsa è tar in u l’auter il plaschair da quest sport uschè grond, ch’ella daventa giugadra, u giugader da hockey.