Siglir tar il cuntegn

Header

audio
Claudio Cadonau cun inqual mument pensiv e da morder
Or da Actualitad dals 30.03.2023. Maletg: Keystone
laschar ir. Durada: 4 minutas 2 Secundas.
cuntegn

SCL Tigers Plirs muments da frust per Claudio Cadonau

Suenter ils dus titels da campiun svizzer en seria cun ils hockeyans da Zug ha Claudio Cadonau midà ed è turnà tar ils Tigers da Langnau. Sco igl è ì pe ziep al club, èsi era persunalmain stà ina stagiun difficila per il defensur rumantsch.

Suenter il dril ils ultims dus onns tar l'EV Zug, il club cun l'infastructura la pli professiunala da tut ils clubs da hockey en Svizra, ha Claudio Cadonau pensà ch'i giaja pli svelt da puspè sa disar vi dal sistem cumplet auter tar ils Tigers da Langnau. Il club nua ch'el è turnà cun dus titels da campiun svizzer gudagnads cun Zug. Turnà cun la missiun da stabilisar la defensiun tar Lagnau. Suandads èn numerus gieus ch'el ha stuì persequitar davent da la tribuna, suenter privlus checks a la banda. Ina situaziun difficila ch'ha dà da morder al defensur cun ragischs en Surselva. Claudio Cadonau ha però stedi prendì il positiv, era or da questa situaziun, ha trenà dir ed il pli tard cura ch'igl è ì per salvar ses club da la relegaziun è el stà quella pitga e quel leader ch'el vuleva esser.

Nagut da festivar

La seria da playout encunter Ajoie han ils SCL Tigers gudagnà cun 4:2. Bain ina seria stretga cun bler dramatica, ma il club da l'Emmental resta en la pli auta liga da hockey da la Svizra. Il levgiament saja grond. Ma gudagnà hajan ils Tigers nagut, els n'hajan betg pers, di Claudio Cadonau. Per il club, che sa mudregia gia divers onns a la cua da la tabella, in pitschen pass enavant, na dapli.

Per l'avegnir dovri continuitad

Sche Claudio Cadonau guarda gia oz enavant sin la proxima stagiun, stoppia la continuitad vegnir bler meglra. En gieus da la qualificaziun han els battì Zug u era ils ZSC Lions. Suandadas èn adina puspè terradas en seria ch'han laschà crudar il club en tschaler. Il positiv ch'il club stoppia prender cun en la nova stagiun, il fatg che l'equipa saja creschida ensemen entras tut il si e giu. Il spiert d'equipa saja propi stà da sentir e vesair pir curt avant ch'ils Tigers da Langnau han stuì prender la via en il playout. Ina stagiun difficila cun ulteriuras experientschas en la lunga carriera sin il glatsch da Claudio Cadonau che cumplenescha la stad ses 35avel e ch'ha anc ses contract tar ils SCL Tigers fin la fin da la proxima stagiun.

RTR actualitad 17:00

Artitgels legids il pli savens