Siglir tar il cuntegn

Header

video
Abols gartegia per Örebro
Or da Sport-Clip dals 27.12.2022.
laschar ir. Durada: 38 Secundas.
cuntegn

Segund di Cuppa Spengler Il HCD gudogna il classicher cunter il Team Canada cun 2:1

Il gieu cunter il Team Canada è adina spezial. E speziala era questa giada er la partenza en il classicher. Il HCD ha fat duos gols entaifer las emprimas duas minutas. Quai era la basa per la victoria.

HCD – Team Canada 2:1

Il club da hockey da Tavau gudogna il classicher encunter il Team Canada. Als grischuns è grategiada ina partenza fulminanta. Gia suenter duas minutas manava il patrun da chasa cun 2:0. Ditg ha il HCD tegni enta maun il gieu encunter il Team Canada. La reacziun canadaisa è pir vegnida en la 38avla minuta, nua che Brett Connolly ha scursani il gieu sin 2:1. Per dapli n'ha quai dentant betg pli bastà. Il HCD gudogna uschia l’emprima partida da la Cuppa Spengler ed il Team Canada spetga suenter duas partidas vinavant sin l’emprima victoria.

HCD cunter Canada: Quai è il classicher tar la Cuppa Spengler. Il duel è era l’inscunter tranter las duas equipas ch'han gudagnà il pli savens la Cuppa Spengler. Il Team Canada è il champiun da record cun 16 victorias, il HCD segua gist suenter cun 15 victorias. L’affischa empermetta pia tensiun. Gia pliras giadas ha il Club da hockey da Tavau pudì batter ils favurits dal Canada – savens dentant be en la fasa da gruppa e betg en la fasa finala. En mintga cas è il gieu adina in spectacul ed in magnet per il public. Er tar il duel da quest onn era la halla plaina.  

Program e resultads da la Cuppa Spengler 2022

Avrir la box Serrar la box

I dat duas gruppas

  1. Gruppa Torriani: HC Ambri Piotta, IFK Helsinki, Örebro
  2. Gruppa Cattini: HC Tavau, Team Canada, Sparta Prag

Ils victurs da mintga gruppa sa qualifitgeschan per il mezfinal. Ils auters dus duain cumbatter en il quartfinal per la qualificaziun per il mezfinal.

26 da december

  • HC Ambri Piotta – Örebro HK 5:2
  • 20:15 Sparta Prag – Team Canada 3:2

27 da december

  • IFK Helsinki – Örebro HK 2:5
  • HC Tavau – Team Canada 2:1

28 da december

  • 15:10 Ambri-Piotta – IFK Helsinki 7:3
  • 20:15 Sparta Prag – HC Tavau 9:2

29 da december – pre-mezfinals

  • 15:10 Örebro HK – Team Canada 3:1
  • 20:15 HC Tavau – IFK Helsinki 3:2

30 da december – mezfinals

  • 15:10 Sparta Prag – Örebro HK 4:3
  • 20:15 Ambri-Piotta – HC Tavau 5:0

31 da december – final

  • 12:10 Sparta Prag – Ambri-Piotta 2:3 s.p.

Örebro ha gudagnà il duel da la Scandinavia encunter Helsinki. L’equipa da l’anteriur giugader dal Club da hockey da Tavau, Mathias Bromé, fa uschia revantscha per la sconfitta encunter Ambri-Piotta. Helsinki é mo stà bun dad ir durant l’emprim terz il tempo da Örebro. Suenter ha l’equipa svedaisa fatg la differenza cun far dus gols en il terz d’amez. Il davos gol è crudà en il gol vid.  

IFK Helsinki – Örebro HK 5:2

Quest onn datti in duel da las equipas dal nord pro la Coppa Spengler: il IFK Helsinki da la Finlanda cunter Örebro da la Svezia. Omaduas equipas èn squadras fitg giuvnas e vulan mussar il grond potenzial che regna en ellas. I dat dentant anc in'ulteriura parallela tranter Helsinki ed Örebro: en omadus equipas datti giugaders che han er gia dà per il Club da hockey da Tavau. Tar IFK Helsinki è quai Otso Rantakari, tar Örebro Mathias Bromé. Tuts duos giugaders turnar pia en in stadion ed en in lieu ch’els enconuschan fitg bain. Rantakari ha pudì dar per il HCD il turnier da la Cuppa Spengler e durant la stagiun 2019/2020, el di che quai saja stada ina da las pli bellas experientschas en sia vita professiunala. Cura che Bromé era part dal HCD è la Cuppa Spengler malavita vegnida annullada. Il Svedais ha dentant gia giugà ina partida tar la Cuppa Spengler da quest on. Quella ha el pers cun Örebro cunter Ambri. Mathias Bromé spetga pia sin ina revantscha da sia equipa.

RTR novitads 15:00+

Artitgels legids il pli savens

Scrollar a sanestra Scrollar a dretga