Sco giuvna skiunza da 18 onns ha Selina Egloff da Scuol pudì ir l'onn 2019 a la partenza dal slalom da Levi. Lura ha ella savurà per l'emprima giada l'aria da la cuppa mundiala da skis. Dapi la premiera èn suandadas anc otg ulteriuras partenzas en la cuppa mundiala da skis. Dentant n'ha Selina Egloff anc mai pudì ir per puncts. A Levi ha la skiunza ina ulteriura schanza da far quai.
Sport d’elita ed il medem mument ir a scola
Suenter onns en il sport da skis ha Selina Egloff fatg avant trais onns ina pausa. La stagiun 2022/2023 ha ella prendì temp per ponderar co vinavant. Durant la pausa ha Selina Egloff decidì ch'i dat per ella anc insatge auter che mo il sport da skis. Ella ha cumenzà cun la scolaziun sco magistra tar la Scola auta da pedagogia a Cuira. Durant ils mais d'enviern metta ella pia il focus sin il sport da skis.
Mia finamira è dad ir pli savens a la partenza da cursas da cuppa mundiala e da far là il proxim pass.
Ils mais da primavaira e la stad po ella dentant emprender per la scola e prender suenter ils practicums ch'èn necessaris sin la via per daventar magistra.
Davosa stagiun ina da las meglras
Dapi che Selina Egloff va cun skis e fa dasperas la scolaziun sco magistra ha ella puspè dapli plaschair dad ir cun skis. Il plaschair è per ella central. Sch'ins fa insatge cun plaschair, alura va tut pli facil, main grev. Precis uschia parta la skiunza da Scuol en la nova stagiun, cun la finamira da far anc dapli cursas en la cuppa mundiala da skis, ed uschia a la fin metter pe en il pli aut nivel da skis dal mund.
