Las cursas dal «Chuenisbergli» ad Adelboden èn las cursas da chasa da l’equipa Svizra. En Surselva Bernaisa vul mintga skiunz Svizzer mussar sia meglra prestaziun. Fin qua n'è quai betg gartegià a Sandro Simonet. Da las trais giadas ch'el era a la partenza tar il slalom dad Adelboden n’è el mai vegnì en la segunda cursa.
Las premissas èn intactas
Questa giada duessi dentant gartegiar. Las premissas per ina buna cursa èn en mintga cas intactas. Tar la davosa cursa da la stagiun a Madonna di Campiglio, ha Simonet mussà la meglra prestaziun da l’entira stagiun. Il skiunz da Casti era suenter l’emprima cursa 30avel ed ha anc fatg durant il segund percurs il sigl sin plaz 12. Era perquai ch’el ha savì ir sco emprim en la segunda cursa è la cursa a Madonna gartegiada al skiunz da 24 onns uschè bain.
Mintga fin d’emna in classicher
Il schaner è il mais il pli intensiv per ils spezialists da slalom. Zagreb, Madonna di Campiglio, Adelboden, Wengen, Kitzbühel e Schladming èn tut classichers che han lieu aifer bundant trais emnas. Uss è stagiun auta era cun las cursas da chasa, nua che mintga skiunz svizzer vul mussar in bun resultat.
RTR actualitad 08:00