Il dies fa anc adina problems. Perquai sto il skiunz da Sursaissa desister sin las cursas da speed en il Canada ed en ils Stadis Unids da l'America, a Lake Louise ed a Beever Creak. Quai ha il management da Carlo Janka confermà sin damonda da RTR. Er anc betg segir è sche Mauro Caviezel va vi sur mar. La scurlada dal tscharvè da la stagiun passada fa anc adina difficultads.
Kryenbühl e Weber mancan perquai ch'els n'èn betg vaccinads
Tant Urs Kryenbühl sco er Ralph Weber han gia gì corona ed èn guardis ma n'han anc betg sa laschar vaccinar. Uschia n'han els nagin certificat da Covid e na dastgan perquai betg entrar en il Canada. Omadus atlets èn en quest connex er s'exprimids a moda critica envers la Federaziun internaziunala da skis (FIS). Els sajan trumpads da la FIS perquai che lezza n'haja betg tschertgà ina lieu alternativ senza obligatori da vaccinaziun. Per sportistas e sportists betg vaccinads possia quai numnadamain avair gronds dischavantatgs tant ord vista sportiva sco economica. Medemamain na sclaudan omadus skiunz er betg dad eventualmain sa laschar vaccinar pli tard cun in auter vaccin che quels ch'èn actualmain a disposiziun.