Premiera per Noe Näff
Noe Näff da Sent na fa anc betg part ad in cader naziunal da Swiss Ski. El trenescha actualmain en il cader regiunal, ed el visita ina scola da sport a Mals en il Tirol dal Sid. Cunquai che Näff ha mussà bunas prestaziuns durant questa stagiun, po el ussa dentant ir als campiunadis mundials da passlung.
Envers RTR ha il giuven atlet ditg che quai saja per el ina gronda schanza. El possia rimnar experientschas e sa mesirar per l’emprima giada cun ils atlets da grondas naziuns da passlung sco la Norvegia u la Svezia. E spezial saja il viadi a Whistler era pervia che ses grond idol Dario Cologna haja gudagnà là sia emprima medaglia olimpica il 2010.
Cla-Ursin Nufer per la terza giada a campiunadis mundials
Cun gronda motivaziun fa era Cla-Ursin Nufer il viadi en il Canada. Mez schaner è il Tuatschin daventà per l’emprima giada campiun svizzer en la cursa da persecuziun, ina cursa sur 15 kilometers en il stil classic. Er sch’ils megliers svizzers na sajan betg stads a la partenza ad Ulrichen en il Vallais na possia nagin pli prender davent ad el quest titel, uschia Nufer che sa participescha gia per la terza giada a campiunadis mundials. Suenter ch’el ha tant il 2020 en Germania sco er il 2021 en Finlanda manchentà be per pauc in plaz sut ils top 15 cun ils plazs 16 respectiv 17 saja quai uss la gronda finamira.
Dentant er per il giuven sursilvan da 21 onns vali en emprima lingia da rimnar experientscha per tut quai che suonda anc en sia carriera. Ils proxims onns vul Cla-Ursin Nufer zic a zic fitgar pe en la cuppa mundiala per lura pudair concurrenzar cun la crème de la crème en quest sport da passlung.
Gronda delegaziun engiadinaisa
Cla-Ursin Nufer è l’unic sursilvan da la squadra grischuna che vegn en acziun als campiunadis mundials da passlung a Whistler. Tut ils auters derivan da l’Engiadina. Sper Noe Näff èn er vegnids selecziunads ils juniors Leandra Beck, Fabrizio Albasini, Marina Kälin, Roman Alder e Niclas Steiger sco er Nadja Kälin, la victura dal maraton da l’Engiadina 2022 che parta sco Cla-Ursin Nufer en la categoria dals U23.
