Tar sia victoria ha Fanny Smith nizzegià, che la dominatura da la stagiun la Svedaisa Sandra Näslund è stada absenta pervi d'ina blessura veglia ch'ella ha puspè sentì. La Svizra da 30 onns ha cuntanschì sia 30avla victoria en la cuppa mundiala – e l'emprima dapi dus onns. Fanny Smith ha gudagnà mintga heat, ed en il final è ella restada tuttina suverana.
- 1. Fanny Smith (SUI)
- 2. Jade Grillet Aubert (SUI)
- 3. Tiana Gairns (CAN)
La Grischuna Talina Gantenbein, Sixtine Cousin e Saskja Lack èn tuttas crudadas ora en ils quartfinals.
Bischofberger meglier Svizzer
Tar ils umens è Marc Bischofberger arrivà fin ils mezfinals, là ha el dentant stuì ceder cunter il Svedais David Mobärg ed il Giapunais Ryo Sugai. La finala è l'Appenzellais daventà 7avel. Per il debuttant da la cuppa mundiala Sandro Lohner è il quartfinal stà la staziun finala, ils ulteriurs Svizzers èn crudads ora anc pli baud. Victur daventa il Svedais Mobärg.
- 1. David Mobärg (SWE)
- 2. Ryo Sugai (JAP)
- 3. Reece Howden (CAN)
Plirs skicrossists svizzers han vinavant mancà pervi da blessuras – uschia Ryan Regez, Alex Fiva, Romain Détraz, Gil Marin e Niki Lehikoinen.
Proxim venderdi e sonda han lieu las duas davosas cursas da la cuppa mundiala da questa stagiun. Per quellas han las atletas ed ils atlets da viagiar a Craigleith en il Canada.