Wendy Holdener vegn sco en il davos slalom da la cuppa mundiala mez schaner a Flachau terza. En sia disciplina speziala perda la Svizra 0,52 secundas sin l'Americana Mikaela Shiffrin, che festivescha sia 69avla victoria en la cuppa mundiala.
Segunda dal slalom en la Slovachia vegn l'indigena Petra Vlhova – ella manava anc suenter l'emprim percurs. La skiunza da 25 onns ha uss mo pli in retard da 107 puncts sin Lara Gut-Behrami per la culla gronda da la cuppa mundiala.
Michelle Gisin puspè en las top 5
Er en il sisavel slalom da la stagiun cuntanscha la skiunza da Engelberg in plaz tranter las tschintg meglras. Il retard da 2,24 secundas sin Shiffrin muntan plaz 5.
Camille Rast è sa meglierada en il segund percurs da plaz 30 sin 17. Mélanie Meillard ch'era 10avla suenter l'emprim percurs, è crudada ora.