Ramon Zenhäusern ha defendì a San Murezzan ses titel da campiun svizzer dal slalom. Uschia è el il campiun dals onns 2018, 2021 e 2022. El ha gì in avantatg da 23 respectiv 24 tschientavels, sin Nöel von Güningen e Reto Schmidiger, che suondan sin plazza 2 e 3.
Ils dus umens dal cader B han pudì metter a pantun Daniel Yule che ha bain gì il meglier temp en il segund percurs, è la finala dentant be vegnì quart.
Slalom gigant da las dunnas
Jasmina Suter è ida per aur a San Murezzan e daventa uschia campiunessa svizra dal slalom gigant. Quai è set onns suenter ses emprim titel. Suenter ella èn Simona Wild ed Andrea Ellenberger sin il podest.
Suter ha gia gudagnà argient en la cursa rapida ed en il super-G.
