Manchentà be piz a cup in ulteriur plaz da podest a las cursas da chasa ad Adelboden ha Loïc Meillard. In di suenter ses terz plaz en il slalom gigant ha Meillard stuì sa cuntentar cun il quart plaz, quai be per in tschientavel davos il podest. Quest quart plaz parta Meillard dentant anc cun il Talian Alex Vinatzer ch’ha pudì far in sigl dal 15avel enavant sin il quart plaz.
Cun Ramon Zenhäusern e Marc Rochat han anc dus ulteriurs svizzers cuntanschì in plaz sut ils top 10. Zenhäusern è vegnì 8avel (+1,20 secundas) e Rochat 9avel (+1,57 secundas). Pers duas posiziuns en il segund percurs ha Daniel Yule che aveva gudagnà questa cursa il 2020. Yule è vegnì 11avel (+1,74 secundas).
1. Percurs
Puncts hai er dà per Luca Aerni sco 22avel (+2,68 secundas). Tanguy Nef è crudà ora en il segund percurs ed il sulet grischun a la partenza, Sandro Simonet da Casti, ha manchentà per 16 tschientavels la qualificaziun per il final cun ils megliers 30. Er betg pudì sa qualifitgar per il segund percurs ha il grond favurit norvegiais Henrik Kristoffersen suenter in grond sbagl. E crudà ora gia en l’emprim percurs è tranter auter il Franzos Clement Noel.
La proxima fin d’emna spetga gia il proxim punct culminant en la cuppa mundiala da skis. Da venderdi fin dumengia stattan sin il program las cursas dal Lauberhorn a Wengen.
