En las cundiziuns primavaunas da Saalbach-Hinterglemm en l'Austria hai dà in nov victur en la stagiun da slalom gigant, numnadamain Loïc Meillard enstagl da Marco Odermatt ch'ha dominà enfin uss. Segund è vegnì l'Andorran Joan Verdu Sanchez (+0,71) e terz Thomas Tumler (+0,79) da Samignun.
Marco Odermatt che manava suenter l'emprim percurs è crudà ora.
Plazza da podest per Thomas Tumler
Sin il terz plaz è vegnì Thomas Tumler da Samignun. Cun 34 onns ha il Grischun mussà sia meglra stagiun insumma. Gia a Palisades Tahoe ed Aspen aveva el mussà ch'el è in candidat per il podest cun vegnir duas giadas quart. En l'ultim slalom gigant da la stagiun hai tanschì per l'atlet da Samignun da far il sigl sin il podest. Suenter quest success è el stà fitg commovì. En sia carriera èsi il terz podest per Tumler.
Il segund Grischun, Gino Caviezel è vegnì 6avel cun in retard da 1,31 secundas.
In record da plazzas da podest ma betg da victorias
Malgrà che Marco Odermatt è crudà ora, tegn el cun 26 plazzas da podest en seria in record en la cuppa mundiala. La marca dad Ingemar Stenmark cun 37 plazzas da podest en seria sa basa – tenor retschertgas da l'agentura da novitads keystone-sda – sin in sbagl en la banca da datas da la FIS. En verdad è Stenmark stà 22 giadas ina suenter l'autra sin il podest – lura ina giada betg – e lura puspè 15 giadas.
Persuenter po Marco Odermatt betg cuntinuar sia seria da victorias en il slalom gigant. En tut ha el gudagnà nov en questa stagiun. Quai tanscha manaivel per la culla da disciplina ma betg per egualisar la marca da 10 victorias en ina stagiun da la legenda da skis svedaisa Ingemar Stenmark. Lez aveva gudagnà l'onn 1978/1979 diesch da diesch slaloms gigants.
A Saalbach-Hinterglemm èn questa e la proxima fin d'emna las ultimas cursas da la stagiun, pia il final da la cuppa mundiala dals umens e las dunnas. Il favrer 2025 han lieu a Saalbach-Hinterglemm ils campiunadis mundials da ski alpin.
