Il podest dad Are
- Federica Brignone (ITA), 2:11,02 minutas
- Sara Hector (SWE), +0,33 s
- Lara Gut-Behrami, +0,40
Gia avant la cursa èsi stà cler: Sche Lara Gut-Behrami gudogna u fa in segund plaz, gudogna ella la culla da cristal da disciplina. Sia pli gronda concurrenta, la Taliana Federica Brignone, aveva 135 puncts retard. Cun la cursa dad oz è l'avantatg da Lara Gut-Behrami sa sminuì sin 95 puncts en il classament da disciplina (745 puncts per Gut-Behrami).
I vesa pia vinavant or bain per la Svizra. Ed en l'intervista cun SRF manegia Federica Brignone ch'ella sez n'haja nagina schanza pli sin la culla pitschna. La decisiun definitiva croda dentant pir proxima fin d'emna tar il final da la stagiun a Saalbach.
Las ulteriuras Svizras
- 17. Michelle Gisin, +3,22
- 22. Camile Rast, +3,56
- 27. Simone Wild, +4,08
Priska Nufer, Andrea Ellenberger e Jasmina Suter n'èn betg sa qualifitgadas per il segund percurs.
Cursa per la gronda culla da cristal
Cun la cursa dad oz ha Lara Gut-Behrami 1654 Puncts en il classament general. Federica Brignone ha 1368 – pia ina differenza da 286. Sin il fegl fissi stà pussibel che Lara Gut-Behrami gudogna gia questa fin d'emna – pia avant il final a Saalbach – il classament total. Quai n'è dentant betg pli pussibel.
Tar il slalom da la dumengia ad Are na fa Lara Gut-Behrami betg part, Federica Brignone va dentant a la partenza. La decisiun per il classament general – ed er en autras disciplinas – crodan pia las proximas duas fins d'emna.