Il podest:
- Marco Odermatt (SUI) 2:31,23 minutas
- Lucas Pinheiro Braathen (BRA) +0,49 secundas
- Léo Anguenot (FRA) +0,68 secundas
El è l’um per ils records: Cun sia 5avla victoria en seria al slalom gigant dad Adelboden scriva Marco Odermatt in ulteriur chapitel da sia istorgia. Il skiunz da la Sutsilvania ha uss tuttina bleras victorias sco Ingemark Stenmark, la legenda svedaisa ch’ha medemamain gudagnà tschintg giadas il classicher al Chuenisbärgli. Ad Odermatt èsi però reussì da triumfar tschintg giadas en seria.
La basa per quest success ha Marco Odermatt mess en l’emprim percurs – cun vegni en l'arrivada cun in avantatg da bun ina mesa secunda sin la concurrenza. Quai avantatg ha Odermatt pudì conservar en il segund percurs. Grazia a quest success è Odermatt era puspè il leader dal classament en la disciplina slalom gigant. Suenter sis da nov slaloms gigants ha il dominatur da la cuppa mundiala da skis uss in avantatg da 95 puncts sin l’Austriac Stefan Brennsteiner ch’è crudà ora en il segund percurs.
Ils ulteriurs Svizzers:
- 6. Loïc Meillard +1,50 secundas
- 10. Luca Aerni +1,97 secundas
- 12. Thomas Tumler +2,23 secundas
Il Grischun Thomas Tumler ha pudì far en il segund percurs in sigl dal plaz 24 sin plaz 12. Avant in onn aveva il skiunz da Samignun anc manchentà il podest be per pauc sco quart. Als ulteriurs Grischuns n’èsi betg ì sco giavischà. Fadri Janutin ha sco 33avel manchentà la qualificaziun per il segund percurs – ed il Surmiran Livio Simonet è crudà ora.
